ORANJESTAD – Palabranan di felicitacion y tambe motivacion Prome Minister Mike Eman a expresa diamars anochi den direccion di Isabella Cristina Croes como e Miho Graduado di Colegio Arubano pa aña escolar 2014/2015. Como parti di e ceremonia di graduacion cu a tuma luga na Renaissance Convention Center, mandatario a haci entrega di un reconocemento special. Esaki ta un iniciativa cu e Minister President a introduci for di su prome aña di gobernacion.

Como muestra di reconocemento y aprecio pa e ehempel cu ta duna na otro hobennan, Prome Minister Eman a haci entrega di un plakkaat conmemorativo. Mas tempran e mesun dia, a ricibi Isabella na su oficina na Edificio di Gobierno pa asina combersa y conoce e hoben y su punto di bista. Premier Mike Eman semper a caracterisa pa ta un persona semper interesa den e pensamento di e hobennan y con Gobierno por aporta na nan metanan.

Anochi e mandatario a resalta tambe e caracter comunitario di 'Chabeli' kende kier dedica parti di su tempo na trabou social na un pais afecta. “Esaki ta loke nos kier den nos hobennan banda di e ambicion pa traha un carera y crea un futuro cu hopi prosperidad; nos kier mira den nos hobennan tambe e sentido compasion pa e prohimo y un curason grandi,” asina Premier Eman a duna di conoce na tur esnan den e sala.

Cariñosamente yama ‘Chabeli’ Croes ta un hoben simpel y alegre, pero sigur determina y cu sa con pa organisa su mes. Despues di a caba di ricibi su plakkaat, e hoben a expresa cu esaki “sigur ta un momento hopi emocionante.” El a felicita tur esnan cu tambe a gradua y desea nan hopi exito. Prome Minister Mike Eman den nomber di Gobierno di Aruba ta extende su pabien na tur graduado di Aruba y hopi exito den e continuacion di nan estudio of carera profesional.

Expresionnan haci den e articulo aki no necesariamente ta refleha opinion di ArenaPoliti.co