Diaranson a tuma lugar e tratamento di e Landsverordening parkeerzones den Parlamento di Aruba. Esaki ta e ley pa trata entre otro e binimento di parkeermeters den nos centro di ciudad cu un di dos fase den e area hotelero. Un tratamento cu a bay relativamente liher den bista di Minsiter Otmar Oduber. E mandatario ta comenta cu tabatin poco pregunta. “For di fraccion di MEP por a nota hopi politica, purbando di mustra cu esaki ta un otro forma di medida. Durante henter e reunion ta solamente 6 pregunta a bin dilanti relaciona cu e topico.”

Ta trata aki di un ley cu lo por trece cambio, un ley cu lo por trece mas trankilidad den centro di ciudad, duna mas oportunidadnan na e tiendanan den nos centro di ciudad, pa nan tin mas parkeo habri rond di nan negoshinan pa clientenan por yega y haya oportunidad como tambe crea mas seguridad. Minister Oduber ta bisa: “Na e momentonan aki riba tur asera tin vehiculonan ta staciona malo, cu ta trece bida di hende den peliger, hende grandinan cu tin cu cana riba asera, mayornan cu ta cana cu nan yiunan mester baha for di asera pa por pasa bay nan destinacion. Tambe tin e cantidad di accidentnan cu ta pasa, caminda ta kibra spiel rasca auto, pa motibo di e hanchinan small den centro di ciudad. E ley aki riba su mes ta crea oportunidad.”

E mandatario ta lamenta cu awe oposicion ta haci como si fuera ta un medida contra pueblo ta tumando. Durante reunion a saca documentonan unda ta visibel cu ta for di aña 2007 caba Conseho di Minister e tempo ey a tuma un desicion riba esaki splicando exactamente e motibonan cu awor tambe a presenta como e motibonan pa bin cu parkeermeters. E tabata asina leu cu tabata cla pa otorga contracto na un compania. Sin embargo Gobierno di MEP a ricibi un carta di Directie Wetgeving pa hinca esaki den un concepto di ley. Banda di kier a pase sin ley sin nada, e plan di e Gobierno di signatura geel, tabata pa kita e contract for di e compania original priva pa otorga e proyecto den man di un persona hopi mas cerca di Gobierno e tempo ey. Sr. Oduber ta sigui bisa: “Tin un articulo publica e tempo ey unda e propio Sr. Briesen, ta splica e meta di e proyecto. Unico diferencia cu e tempo ey e tabata di bay pa un compania priva aunke cu deseo tabata pa e bay Arubus pa genera fondo adicional pa e compania di transporte publico  y awor Gobierno actual ta haci netamente esey.”

Pa e apecto di control, esaki lo ta tur caminda rond unda lo tin e parkeerwachternan cu ta bay percura pa e seguridad cu nan presencia den centro di ciudad. A haci un cambio riba e ley di biaha pa e parkeerwachternan aki haya e autoridad pa controla tur auto den e zona specifico aki cu ta mal staciona. Cu e ley aki e parkeerwachternan awor por actua.

Fraccion di AVP a presenta un mocion  pa e habitantenan cu ta biba den e zona cu no tin un garashi propio pa staciona nan vehiculo y ta haci uso di un di e vaknan. E mocion ta papia di reduci e tarifa pa por haci uso den e vaknan rond di su cas. Ya caba Minister Otmar Oduber a combersa cu Arubus riba e topico. E mandatario ta comenta “Ta na su lugar pa e casnan cu no tin propio stacionamento pa nan vehiculo, ricibi pa nan auto un notificacion pa por staciona gratis den cercania di nan cas.” Riba e topico di esnan cu ta labora den centro di ciudad, ta keda liber pa haci uso di e stacionamentonan of terenonan publico, pero lo cual Arubus a percura p’e ta cu cierto regionnan hendenan cu tin tereno priva lo cobra e empleado 75 Florin pa luna. E ta keda un opcion pa e trahador cu si e kier sigura un stacionamento mas serca di su trabou.

Si e efectividad di e proyecto ta rond di 60 pa 65 % ta calcula cu e proyecto lo por genera mas of menos 2 miyon na entrada. Lo tin gastonan manera operacion cu lo mester cubri for di e fondonan aki, pero e ventaha di esaki ta cu e fondonan ta bay pa Arubus. Esaki ta traduci cu e fondonan cu normalemente ta wordo subsidia pa Gobierno, lo conoce un reduccion substancial.

Expresionnan haci den e articulo aki no necesariamente ta refleha opinion di ArenaPoliti.co