Awemainta a publica e resultadonan di e envestigacion medico di e patalogo den e caso di morto di Mitich Henriquez. E envestigacion tabata pa determina e causa di morto. E conclusion ta cu Mitch Henriquez a muri a consecuencia di e mal trato door di e cinco polisnan cu a aresta e victima. E cinco miembronan di cuerpo di polis di Den Haag envolvi den e caso aki, a wordo sospendi y acusa di ta envolvi den e morto innatural di e victima. E insinuacionnan cu e victima lo a usa droga of exceso di alcohol, a wordo exclui door di e envestigacion medico.

GRITO PA HUSTICIA
Fraccion di AVP ta gradici autoridadnan pa a haci e envestigacion lihe y pa publica e resultadonan. Esaki a kita e duda cu tardansa y inclaridad ta crea. E forma rapido aki di aende cu esaki ta duna trankilidad na famia y amigonan di e victima y na e comunidad, tanto na Aruba como na Hulanda.
Awor HUSTICIA mester sigui cana su caminda y sigura cu e mes un procedura, regla y normanan legal cu ta aplicabel den casonan similar, lo wordo aplica den e caso aki. Nos deseo ta pa HUSTICIA prevalece. Tambe den e caso tristo aki.

PARA E TREND DI ABUSO DI POLIS
Serca fraccion di AVP a surgi si un preocupacion pa e cantidad di actonan di uso excesivo di forsa door di polis na Hulanda. Despues di e caso di Mitch Henriqiez, un cantidad di caso a wordo publica via medionan social. Esaki ta motibo pa preocupa. Pero mas ainda e ta pidi pa atencion directo y structural di autoridadnan di husticia pa e desaroyo peligroso aki. Fraccion di AVP lo entama e discucion cu coleganan di parlamentonan di paisnan di Reino, pa para e trend aki. Via DIALOGO constructivo sin prehuicio y via EDUCACION y informacion nos por expone e problema te den su rais y atende cun'e den forma decisivo.
Rene Herde': "Fraccion di AVP a designa entre otro sra. Desiree de Sousa Croes pa sigui tur desaroyo riba e tema aki pa nos fraccion. Pa loke ta e caso di Mitch Henriquez ainda tin diferente pregunta pa contesta. Nos tin cu warda riba e resultado di e envestigacion di Ministerio Publico di Den Haag y con Ministerio Publico ta dicidi di sigui atende e caso. Fraccion di AVP ta keda den contacto cu autoridadnan hudicial di Aruba, cu coleganan den Parlamento di Hulanda y nos ta sigui tur loke Ministerio Publico hulandes haci. E final mester ta cu HUSTICIA lo vence, manera nos tur mester por confia cu semper esey lo ta e caso den tur pais di Reino."

Expresionnan haci den e articulo aki no necesariamente ta refleha opinion di ArenaPoliti.co