ORANJESTAD -- Lider di MEP Evelyn Wever-Croes den Parlamento a bisa cu e medida di cobra pa parkeer no ta necesario, pasobra tin alternativa. "Segun e minister e ley di cobra pa parkeermeter ta necesario pa 3 motibo: pa evita mal stacionamento, pa hasi centro di cuidad mas accesibel y pa limita efectonan negativo pa falta di parkeo.

Y pa esaki ta bai cobra a parkeer ta 2 florin pa ora. Si den 1 ora e parkeerwachter constata cu ainda bo no a paga, e lo cobra un boete di 75 florin. Si den 2 ora ainda bo no a paga, e lo pone klem na tire di bo auto. E gasto di kita e klem plus e boet mester core pa e cliente. Despues di 3 ora nan por tow bo auto, gastonan ta 225 florin. Tur esakinan ta MEDIDA! Aruba merece mihor, y NOS KIER ALTERNATIVA, NO MEDIDA.

Ademas Raad van Advies a bisa gobierno cu e no por logra e metanan aki cu e ley aki, y mi ta di acuerdo cu Raad van Advies.
Si e problema ta autonan mal staciona, aki na Aruba nos tin leynan di trafico, y agentanan cu tin na nan encargo pa vigila esaki. Esnan cu no ta cumpli cu ley di trafico mester worod sanciona. Bo no mester bai castiga HENTER un pueblo cu medida di parkeermeter, djis pasobra tin algun hende ta staciona nan auto malo. Si e problema ta cu mester hasi centro di cuidad mas accesible, bo no ta logre asina. Cu esaki bo ta core cu e hendenan! Si e problema ta scarsedad di parkeo, bin cu e parkeergaragenan cu bo a priminti. Pero no bai suta henter e pueblo cu e medida aki.

Pesey mi ta bisa cu Gobierno NO ta honesto cu pueblo, y Raad van Advies ta di acuerdo. Esakinan no ta e metanan REAL di gobierno, pasobra si eseynan ta bo metanan REAL, tin alternativa y no mester di medida.
Sinembargo e meta real ta pa pone pueblo paga pa caha di Arubus, en bes cu gobierno ta paga na caha di Arubus.
Pues ta pasobra Gabinete Mike Eman a redobla nos debe, a hinca e pais aki den bancarota, y pasobra e ta totalmente incapas pa maneha nos pais, pesey awor mester bin cu e medida aki.
Locual ta mas tristo, ta tres medida den un solo siman: financial transfer tax pa paga e Green coridor cu 12 parlamentario iresponsabel a aproba dialuna, awe parkeermeters, y diabierna aumento di BBO. Pueblo, berdad ora AVP ta na mando, wanta bo cartera!" segun Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co