Den un entrevista Parlamentario, sr. Guillfred Besaril, a elabora riba e problematica di rijbewijs na Aruba. Parlamentario Besaril a duna e siguiente declaracion:

"Otro luna Augustus lo bira exactamente 1 aña caba cu Aruba ta haye confronta cu e problema cu rijbewijs. No tin rijbewijs roos ni pa esnan cu mester renoba, ni tampoco pa esnan cu ta pasa nan examen!

Aña pasa na momento cu e problematica a surgi, mesora nos fraccion a aserca e Minister en cuestion pa puntra kiko tabata pasando. E contesta cu nos a ricibi di e mandatario tabata cu e contracto cu e proveedor na Hulanda a termina y cu lo opta pa laga traha e rijbewijs localmente. Nos fraccion no tin nada encontra cu e intencion di laga traha e rijbewijs na Aruba mes. Nos tambe ta mira cierto beneficio den esaki, por ehempel cu enbez di warda 3 siman lo por haña e rijbewijs den un tempo mas corto. Loke nos a cuestiona e tempo ey tabata e forma con tur cos a bai. Con por ta posibel cu ta laga un contracto termina, sin cu tin un plan concreto pa garantisa e continuacion di servicio di otorgamento di rijbewijs (roos)?

Cada biaha cu nos fraccion a puntra of cuestiona Gobierno cu a tarda demaciado pa bini cu un solucion concreto riba e problematica di rijbewijs, nos tabata ricibi un avalancha di excusa y promesa cu "Pronto" lo tin un solucion definitivo. "Pronto" a bira practicamente 1 aña! Esaki ta un hecho totalmente inacceptabel pa un Pais cu ta promociona su mes como un supuesto "Trendsetter" den Caribe. E tema di rijbewijs tambe a keda ampliamente discuti durante e tratamento di tanto Presupuesto 2014 como esun di 2015. Nunca nos fraccion a ricibi un contesta cu tabata realmente satisfactorio. A lo largo di e problematica e titular di Husticia a implementa un solucion "Temporario", esta e rijbewijs blanco. Un solucion "Temporario" cu a dura mas cu 6 luna! Un hecho cu na final a causa mas problema y disgusto cu un alivio, pa motibo cu no tabata trata di un rijbewijs cu por a wordo usa den exterior.

E problematica di rijbewijs ta laga nos cu un incognita grandi atras: "Si pa un asunto manera otorgamento di rijbewijs mes, Aruba mester a pasa den tanto "Tramalan", ta con lo bai para e ora cu e problema of retonan mas serio cu nos Pais mester bai enfrenta?" A yega ora pa e titular di Husticia bin pa dilanti y splica Pueblo kiko a pasa y ki dia lo tin solucion concreto pa cu e asunto di rijbewijs. Ta hopi te cuidadanonan cu a haya nan mes perhudica den exterior pa motibo cu e diferente car-rentals no ta accepta e rijbewijs blanco temporario. Y un respuesta politico no ta necesario mas. Manera cu mi a elabora prome, nos a debati ampliamente den Staten riba e tema. Nos fraccion ta spera cu e mandatario compronde cu e tin un deber directo awor cu Pueblo, no cu Staten mas. Esnan cu a pasa den mal rato pa motibo di su decision "Temporario" y e retraso increibel den e problematica, merece un splicasion di su parti.

Nos fraccion ta spera por ultimo, di mira mas empeño di parti Gobierno na mehora su servicionan. Awe ta e tema di rijbewijs roos, pero "As we Speak" tampoco no tin ID-kaart cu ta wordo traha na Censo! Esaki tambe lo bai tarda un aña cune prome cu tin un solucion? Asina aki cosnan no por sigui mas na Aruba, e Pueblo difinitivamente merece mihor!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co