ORANJESTAD – Awe tardi minister Mike de Meza, titular di Asuntonan Economico, Comunicacion, Energia y Medio Ambiente, hunto cu colega minister Paul Croes, Labor, a hasi un bishita na e oficinanan di CITGO na Houston. Duranta e encuentro Minister Mike de Meza a firma un Memorandum of Understanding den nomber di Gobierno di Aruba cu e compania mericano CITGO. Asina tambe a tuma e prome paso pa e posibel rehabilitacion di e refineria na Aruba. E MoU aki ta habri caminda pa cuminsa hasi e estudionan tecnico y economico pa posible participacion di CITGO den operacion di e refineria.

Dialuna mainta a sali pa Houston un delegacion encabesa pa Minister Mike de Meza. Como parti di delegacion tambe a biaha Minister di Asuntonan Social y Labor Paul Croes, como tambe conseheronan riba tereno legal, energetico y economico. Minister Mike de Meza a cuminsa conversacionan cu CITGO for di cuminsamento di a aña aki y a topa cu ehecutivonan di e compania personalmente. E mandatario a splica cu loke ta sigui despues di e firmamento di e MoU ta un periodo di hopi actividad, di negociacion, evaluacionnan y investigacion.

Asina cu e MoU ta firma CITGO lo cuminsa manda diferente delegacion Aruba pa haci e compania petrolero Mericano su “due diligence”, consistiendo di evaluacionnan detaya di tur e aspectonan tecnico y economico di e refineria na San Nicolas. Durante e periodo di negociacion a haña asistencia di Ministerio di Asuntonan Exterior di Hulanda, nan expertonan, como tambe nos partnernan strategico riba sostenibilidad. Ademas semper a mantene Valero al tanto di tur desaroyo rond di e refineria y naturalmente e compania lo ta parti di e proceso aki tambe. E MoU aki ta un resultado concreto di e empeñonan cu Gobierno di Aruba ta hibando for di algun aña.

Minister de Meza, aunke cauteloso, a expresa su mes na un forma positivo riba e desaroyonan. Si den caso cu yega na un acuerdo di CITGO, nos por ta papiando di un contract di por lo menos 20 aña. Un beneficio grandi, Minister de Meza a remarca, ta cu CITGO tin aceso na crudo y ta un compania profesional y internacionalmente conoci y respeta den e mundo petrolero.

E mandatario a splica cu e compania aki tin e tres factornan cu ta necesario pa un bon desaroyo di e refineria, esta experiencia, expertisio y e acceso na crudo. Minister Mike de Meza a subraya cu e periodo nos dilantia lo ta uno di evaluacion intensivo. Sinembargo ambos mandatario presente na Houston ta sumamente contento cu e paso aki y ta spera cu e trabounan nos dilanti lo conclui di un manera satisfactorio pa pueblo di Aruba, en particular e parti p’ariba di nos isla.

Expresionnan haci den e articulo aki no necesariamente ta refleha opinion di ArenaPoliti.co