E reunion publico tocante e Ley di Presupuesto 2016 cu a keda trata recientemente a haci Chichi pensa hopi. Chichi tin hopi pregunta awo. Entre otro Chichi ta puntra Minister Paul Croes riba reapertura di e refineria ta kico Chichi, un di e 100mil habitante di pais Aruba cu tambe kier un “bon” trabou y entrada, un Arubiano simpel, ta gana cu esaki si ni e ni su casa ta ingeniero, secretaria of ‘pipe fitter’. Kico a cambia riba mercado laboral total?...un gota den lama.

Otro pregunta cu Chichi ta haci ta concerni e belasting basico cu e refineria lo genera, segun Minister de Meza un 27 miyon, loke den opinion di Chichi ta un ‘miseria’. Segun Prome Minister Mike Eman e refineria lo genera un 60 pa 70 miyon (y ainda falta!)... ta con e som aki ta? Chichi ta haya cu ta tempo pa ken cu bin gana placa riba e isla aki, laga un bon suma di belasting tambe atras. After all, e tereno unda e refineria ta situa despues no ta sirbi ni pa dera morto. 80 aña di ‘tax holiday’ ta mas cu bon. Chichi ta bin ta tende pa basta dia caba cu Aruba ta bay cumpra e refineria for di Valero. Anto e ta puntra ta cu cua placa esaki lo sosode mirando cu Aruba ta den un debe grandi cu ta te aña “dios-sa-cuanto” lo keda elimina. Chichi, djis pa curiosidad, kier sa e prijs di e refineria (e ta pensa cu e tambe lo tin chens di cumpra esaki). Aunke Chichi ta tene na cuenta cu maneho y operacion di un refineria no ta coy loco y ta e inversion mas importante. Splica mi e som aki?...

Segun Chichi a compronde, Zika no a yega Aruba. Pero no mester tene miedo mas. Chichi kende ta gusta informa su mes, a haya sa cu na pais Brazil ya tin un variedad geneticamente modifica di e sangura Aedis Aegypti pa combati Zika cu e gobierno di pais a aplica caba cu bon resultado. Aruba lo por cumpra e sangura modifica aki pa combati Zika. E bon di e sangura modifica ta cu denter di 3 pa 4 dia net prome cu yega su tempo pa reproduci,  e ta muri. Di e forma ey e malesa lo keda eradica. Si tin placa pa proyectonan PPP anto sigur mester tin pa pueblo su salud, cu no tin prijs. Chichi ta pensa caba con anochi e por sinta pafo atrobe den su cura sin molester di sangura...

Ta di con Minister Otmar Oduber no a pone su carta di retiro na disposicion di Parlamento? Chichi kier sa ta kico ta para den dje; di con el a bisa cu e ta tuma su retiro ni kico cu pasa “su decision ta tuma” (ta su palabranan). Anto diripiente tin brasamento, harimento, ken a pusha ken pa drenta politica entre su persona y Minister Presidente Mike Eman. Chichi ta puntra si ta e liderazgo di AVP a wordo priminti na Minister Oduber? Paso, sinceramente, kico mas falta?

Chichi a keda masha conmovi cu e disertacion di Parlamentario Desiree de Sousa-Croes unda e sra. aki a defende derecho di e grupo ‘minoritario’ LGTBI, esta e asina yama ‘homosexual’ sea homber of muhe. Chichi ta puntra cu si un isla di 5 strea, manera Aruba ta wordo propaganda, masha tempo caba no mester a wordo educa pa RESPETA tur hende manera e prome capitulo di nos Constitucion ta manda? Pueblo ta wordo teni ignorante y ta ora cu e hipocresia di marca mayor aki mester caba. Manera sra. de Sousa-Croes a bisa “nos ta tur caminda”. Nos ta bo ruman, bo omo, bo tanta, bo prima/primo, bo amigo/amiga etc. Mester educa y conscientisa pueblo riba e topico aki y stop di uza esaki como arma pa contribui na discriminacion y segregacion, pa asina nos comunidad por biba den harmonia y respet.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co