Manera ta conoci caba Gabinete Eman a anuncia cu den futuro cercano lo tin un fondo independiente cual lo concentra su mes riba financiamento di diferente proyectonan como remplasante di Fondo Desaroyo. Esaki ta sona masha bunita pero e realidad ta cu proyectonan PPP ta un riesgo financiero grandi pa Aruba vooral na e manera iresponsabel cu e ta tumando lugar. Den principio e idea di un construccion di PPP ta cu gastonan di financiamento y e riesgonan lo wordo carga door di e private partner asina eventualmente e lo cumbini gobierno. Pero loke no mester lubida ta cu finalmente pais Aruba lo ta esun mara na periodonan largo di pago. For di principio instancianan internacional y  sindicatonan a expresa nan incertidumbre y preocupacionan over e metodo aki. 

 

Desaprobacion di PPP

PPP ta un metodo cu ta wordo hopi usa pero esaki tin su ventaha y desventahanan. Den e caso aki nos kier enfatisa riba e hecho cu e riesgonan financiero a wordo anticipa y presenta door di instancianan internacional manera IMF y Fitch. Un ehempel di esaki ta e siguiente citacion di e rapport 2013 di IMF :" Payments for the investment projects under the Public Private Partnerships (PPP), which are not included in staff’s baseline scenario, will further widen the deficit.For the PPP, staff recommended putting a limit on the size of the PPP-related expenditure commitments. Den cortico IMF a bisa cu pagonan relaciona cu PPP lo keda causa deficitnan riba nos presupuesto y ta recomenda pa limita e projectonan aki di inmediato sino e lo tin su consecuencianan riba acumulacion di nos debe nacional. 

 

Sindicatonan tambe a vocifera nan pensamento over e projectonan ppp. Nan a expresa entre otro cu financiamento priva lo mester wordo critica den tur aspecto. E argumentonan treci padilanti ta cu al final e projectonan aki ta sali hopi mas placa di loke a wordo premira. Aserca enfasis a wordo poni riba e hecho cu lo no tin bista cla di nos finansas publico. Esaki kiermeen cu gobierno lo sconde gastonan real di nos pais y e debe real di PPP for di e presupuesto.

 

CFT tambe a señala e riesgonan di PPP

CFT a enfatisa cu e intencion di institui un fondo independiente pa cubri projectonan ppp ta di cuestiona pa diferente motibo. Loke a wordo señala den principio ta cu e creacion di un fondo lo no yuda den lo absoluto cu nos problema presupuestario. Mas aleu CFT ta indica cu basicamente gobierno lo djis keda stel uit e problematica pero no ta solucione. Fuera di esaki mester considera semper cu e gastonan por resulta di ta mas halto di loke a calcula na un promer instante. Tambe CFT a pone enfasis cu implementacion di un fondo independiente lo kita parti di e derecho di autorisacionan di parlamentarionan poniendo cu control debido lo no tin mas y e contenido di trabou di presupuesto lo desaparece. E realidad ta cu gastonan lo bai sali di e fondo sin cu parlamento tin un bista cla  y lo no tin control riba esakinan. De factodebenan real di PPP por wordo scondi . 

 

E investigacion di CFT tambe a saca afor y confirma cu e gastonan di projectonan PPP no ta sostenibel pa nos presupuesto. De facto e ultimo añanan e presupuesto di nos pais Aruba nunca a duna un indicacion of señal cu nos pais lo tin un surplus pa por pensa riba projectonan den gran escala. E rapport ta pone enfasis cu e gastonan di projectonan ppp lo pone hopi presion riba nos finansas publico y lo tin un suma di approximadamente 100 miyon pa aña desde 2019 cual riba su mes ta nifica un peso financiero enorme. 

 

E conclusion ta cu no ta for di awor Gobierno a wordo recomenda pa "break" limita e cantidadnan di projectonan. Tur instancia incluyendo CFT a señala e riesgonan y a mira mas leu cu nan nanishi. Esaki kiermeen nan a anticipa e consecuencianan financiero pa nos pais pero lamentablemente gobierno ta e unico cu no kier mira esaki. Enfasis mester wordo poni riba e hecho cu gobierno ta marando pais Aruba na compromisonan di 25-30 aña largo di gastonan sin cu a midi e consecuencianan. E realidad ta cu nan propio maneho financiero nunca a duna espacio pa por logra hasi proyectonan. Pesei e ta incomprendibel dicon ta keda insisti cu PPP (den 5 speed) siendo cu NO TIN PLACA!