E posicion aki a keda manifesta recientemente tanto pa Minister di Relacionnan di Reino y WRR, entidad halto di conseho di Gobierno Hulandes y ta demostra no solamente cu Gabinete Mike Eman I y II ta haya rason, pero cu Reino tin admiracion pa e vision cu Pais Aruba ta tumando cu consistencia. Prome Minister Mike Eman, durante conferencia semanal cu prensa, a remarca cu e desaroyonan aki ta comproba cu loke semper su Gabinete a bin ta bisa y para p’e, tabata na su luga, esta cu mester pusha e economia pa crece, sin laga e ciudadano desampara.

“Aruba a dicidi cu kier a inverti den e calidad di e producto; no tanto expande, pero inverti den e ‘earning capacity,’” asina Minister President Mike Eman a trece dilanti. E mandatario ta haya interesante cu despues di cuater aña, na Hulanda e Wetenschappelijke Raad voor het Regeringsbeleid (WRR), cu ta un di e organonan halto pa duna conseho na gobierno, a bin cu un punto presenta den un rapport y ta bisa: “Gobiernonan por stimula e economia di nan paisnan di e miho manera dor di reenforsa e poder adkisitivo di e pais... E ta trata aki di ekipa e infrastructura, institucionnan y e capital humano di tal forma cu nan por reacciona adecuadamente na e posibilidad y retonan.”

Esaki ta loke e entidad prestigioso aki ta conseho Gobierno di Hulanda, despues di cuater aña di austeridad. Ora ta wak bek na Aruba, ultimo cuater aña tabata di inversion den mehoracion di producto, renobacion, haci ATA independiente, inversion den reparatiestoeslag y schoolkinderenstoeslag, entre otro, como tambe reduccion di tarifa di awa y coriente y inversion den e capital humano. “Ora storia wordo skirbi di e epoca dificil aki di Aruba, nos tin hendenan di bastante reputacion halto na mundo cu ta para y ta comparti cu nos den e forma con nos atende e crisis,” asina Premier Mike Eman a bisa.

E maneho di Gabinete Mike Eman I y II y e conseho di WRR ta uno cu Professor Paul Krugman, Premio Nobel pa Ciencianan Economico tambe ta respalda. El a bisa cu “Corta den inversion publico den un economia deprimi, ta deprimi esaki mas ainda; austeridad mester warda te ora un recuperacion fuerte ta na bista.” Esaki ta exactamente loke Gobierno a bin ta bisa semper: “Eerst groeien, dan snoeien.” Prome economia tin cu crece.

“Percura pa economia ta fuerte cu esnan cu ta forma parti di bo sociedad tin un poder di compra, tin un forma cu si mas laat bo ta pidi nan paga un extra 1% di health tax of pa contribui cu un pago pa pikimento di sushi; bo no ta puntrando 15% cu ta den desempleo, cu no tin un reparatietoeslag, pero bo ta haciendo un apelacion cu a pasa dor di crisis cu un sosten grandi, cu a inverti den creacion di cupo di trabou y poder di compra. Bo tin un comunidad ta carga e pesonan cu tin y ta sigui riba e caminda di crecemento,” asina Prome Minister Mike Eman a trece dilanti.

Gabinete Rutte di Hulanda tambe ta valida e maneho di Gabinete Mike Eman. Apesar di tur tension cu tabatin entre Aruba y Hulanda pa presupuesto, Minister Plasterk a para largo den Tweede Kamer pa duna di conoce su aprecio na e forma con Aruba a articula un vision di harmonia den Reino. E Minister Hulandes a duna hopi atencion tambe na e vision di Aruba pa energia sostenibel, segun Premier Mike Eman. “Den tur e diferencia di opinion cu por tin, e respet y admiracion y e forma consistente cu Aruba a bin trahando y ta wordo admira den e nivel mas halto di Reino, Nacionnan Uni y te hasta Merca pa e vision di Aruba,” e mandatario a bisa.

Expresionnan haci den e articulo aki no necesariamente ta refleha opinion di ArenaPoliti.co