E trabou di maestro ta uno cu sin duda ta bin acompaña pa su retonan. Esaki ta un hecho si nos observa e cambionan den nos sociedad durante e ultimo 10 pa 15 añanan. Nos sociedad ta uno multicultural y banda di esaki ta wordo influencia dor di diferente medionan cu ta na disposicion di tur hende, incluyendo nos hobennan. Traha cu mucha ta exigi hopi pasenshi y esaki mester wordo traduci den hasi bo trabou cu amor y dedicacion pa asina e mucha por sinti su mes liber y sigur.

Fondonan destina pa enseñansa

Parlamento di Aruba a aproba e ley aki caminda cu a pone fondonan disponibel pa diferente trabounan di mantencion cu ta encera verfmento di edificionan, asfalta tereno di scolnan, limpiesa etc.. E trabounan aki ya caba ta den ehecucion. Parlamentario Kelly kier enfoca riba e parti di duna mas “tools” na maestronan.

Parti di e onderwijsfonds cu Parlamento a aproba ta encera programanan pa duna docentenan mas instrumento y conocemento pa por atende cu e retonan den nan trabou na un manera mas efectivo. Nos por a mira e programa di “Conscious Discipline” cu a tuma luga luna pasa. Mayoria di scolnan preparatorio y primario ya caba ta aplicando e programa aki cu ta un “shift” den pensamento y forma di actua, caminda e adulto ta bira un modelo pa e hobennan.

A introduci e kerndoelen y “kerndoelenwerkdocument” cu ta inclui tur informacion cu e scolnan mester tin, pa asina realisa e nivel minimo di conocemento y habilidadnan di diferente topico di matematica pa un bon transicion di e alumno for di scol basico pa scol secundario. Meta di esaki ta pa garantisa cu na fin di e carera di scol basico tur hoben ta riba e mesun nivel.

A organisa e “School Leadership Certification Programme” pa lidernan den e ramo di enseñansa caminda cu a trata modulonan di un programa special. Durante e programa aki a discuti kico ta profiel di scolnan efectivo y e relacion y apoyo entre profesionalnan pa siña hunto.

Reconocemento di nos maestronan

Durante evento di “Appel di Oro” varios maestro a wordo renonoce pa nan aporte na enseñansa. Maske cu ta hasi e trabou aki cu cariño y amor pa e muchanan ta bon pa para keto un rato y demostra kico e trabou di un maestro ta y duna esaki su balor. Educacion ta keda pilar di nos nacion y mester duna honor na esnan cu ta carga e pilar aki. Dunando honor na personanan cu ta resalta den enseñansa, ta habri porta pa mas reconocimento y mas concientisacion pa loke ta e trabou di maestro, cabesante y tur esnan cu ta aporta na enseñansa en general. Parlamentario Kelly ta spera cu esaki lo ta un incentiva pa maestronan por sigui hasi un bon trabou pa nos hobennan.

Expresionnan haci den e articulo aki no necesariamente ta refleha opinion di ArenaPoliti.co