Lider di MEP Evelyn Wever-Croes a papia cu varios comerciante den Caya Betico Croes tocante e problema cu e parkeermeternan a causa den centro di ciudad.
"Mi kier a scucha di e comerciantenan con a bay den ultimo e simannan, y si algo a cambia. Sinembargo nan a informa mi cu nada a cambia. Es mas, algun comerciante a informa mi cu nan a cuminsa haci propaganda cu nan mes ta paga e parkeermeter pa e cliente, pero ni asina e cliente no kier bin Playa. 
Y ora mi a puntra nan dicon asina mes clientenan no ta bin Playa, e comerciantenan a informami cu ta pasobra e cliente no kier hinca placa den e parkeermeternan cu ta bay den man di esnan rond di e minister. E desconfiansa ey ta locual a caba di kibra e poco posibilidad pa e parkeermeternan por funciona.
E idea di parkeermeter tin hopi resistencia, principalmente pasobra minister Otmar Oduber a core introduci'e, sin un bon planificacion. Un proyecto asina mester a bin despues cu gobierno crea bon oportunidad di parkeo, e asina yama parkeergaragenan. Tabata tin 3 den planning pa centro di Playa, entre otro dilanti Kok Optica y tras di Botica Oduber. Sinembargo e parti esencial di e plan ey nunca a bin.
Tambe e forma cu a scohe pa structura e entidad nobo aki, a causa hopi duda y resistencia. Raad van Advies a conseha e minister pa no bin cu Aruparking, pero e minister no kier a scucha. Pa colmo e minister a apunta su team di campaña electoral den e board di Aruparking, y tur esaki a lanta hopi mas duda ainda.
Cualkier cu ta e caso, negoshinan den Caya Betico Croes a wordo perhudica severamente cu e accion aki, y no tin miras riba un solucion pronto. Comerciantenan a conta cu fin di aña ta e mihor temporada di venta den caya, pero awor tin preocupacion serio si nan ta logra lanta cabes di e problemanan serio cu e parkeermeternan ta causando nan. Esnan cu ta traha den e tiendanan den caya tin temor grandi si nan por keda cu nan trabou. Esaki no ta husto.
Locual mas mi ta lamenta ta cu en vez cu e minister scucha esnan mas afecta, y traha cu nan pa yega na un solucion, e minister ta actua na forma masha arogante y fresco cu esnan mas afecta. Nos lo trata, atravez di e canalnan via Parlamento, pa sondea con por trece alivio den e problema aki, pasobra awor si ta obvio cu minister Otmar Oduber, esun cu a causa tur e problema aki, no por soluciona e problema.
Nos centro di ciudad merece mihor, esnan cu ta traha den e tiendanan ey merece mihor. “Aruba merece mihor", lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co