Partido MEP no sa con mas haci pa purba pega nan mes na cos bon cu ta sosode den nos comunidad. Nan kier elogio pa e "linear park" cu nan no a traha. Nan kier elogio pa e prijs di awa y coriente cu a baha dos aña pasa bou gobierno di AVP. Nan kier honor pa otro proyectonan cu nan no a ehecuta. Awor cu e compania SITGO ta mustra interes serio pa habri e refenineria atrobe, MEP kier crea e impresion cu ta danki na nan esfuerzo cu e refineria lo por habri atrobe. Esaki ta otro hipocresi si bo wak con e partido MEP aña tras di aña a trata e refineria na Aruba.

CONTRA
E forma cu partido MEP sistematicamente a bay contra di e refineria ya ta un echo historico. Na 2009 a pone e refineria sera pasobra a insisti pa e compania paga BBO. Contra di tur conseho huridico y economico gobierno di MEP a insisti te bay corte pa obliga un di e poco companianan cu ta exporta producto of servicio di Aruba pa paga belasting extra. E siman cu a pasa ainda aki na Aruba expertonan di IMF a bisa cu bo no ta pone belasting adicional riba exportacion. E refineria a sera door di MEP na 2009. Mas cu 1500 hende a perde trabou y entrada. Economia a haya un sla duro. Gobierno a perde mas cu 200 miyon florin na entrada pa aña. No ta por nada ta bisa cu MEP a empeora e crisis financiero mundial pa Aruba. IMF a yam'e e "dubble dip" pa Aruba.
Na 2011 MEP a bay CONTRA di e re-apertura di e refineria, pasobra segun nan e compania tabata sinberguensa. Mes un actitud nos a wak di MEP algun siman pasa ora nan a expresa nan mes contra di empresarionan na Aruba. Awor, na 2015, despues di añanan di trabou insistente di gobierno y en especial minister Mike de Meza, e refineria por bay habri atrobe. Ainda no ta sigur, pero ya e partido MEP, den su forma oportunista di semper, kier elogio pa e posibel re-apertura. Nan kier hasta crea e impresion cu ta danki na MEP cu e refineria ta bay habri atrobe. Esaki no ta djis un hilaridad. E ta mustra e actitud inconsistente di MEP. E ta mustra e oportunismo supremo di MEP y e hipocresia politico grandi den MEP. Semper nan ta contra di e refineria, pero awe kier pa hende kere cu ta nan a percura pa e habri'e. En berdad pueblo no tin nada na MEP.

Expresionnan haci den e articulo aki no necesariamente ta refleha opinion di ArenaPoliti.co