Evelyn Wever-Croes: Reunion cu parlamentario Bosman
ORANJESTAD -- Desde e biahe cu líder di MEP Evelyn Wever-Croes a hasi pa Hulanda dos siman pasa, hopi oponente a purba bruha cos, y te hasta duna e biahe un aspecto negativo.
E biahe riba su mes tabata un tremendo iniciativa di e líder di MEP cu a demostra liderazgo cu aki na Aruba tin hende hopi preocupa cu e mal relacion entre Hulanda y Aruba. Mirando cu e líder eligi di e pais aki Mike Eman no kier bai dialoga cu Hulanda, no a keda e líder di oposicion nada otro cu bai cuminsa e dialogo e mes, den nomber di pueblo di Aruba.
Y mester bisa cu e reaccionnan tabata hopi positivo, y politiconan hulandes mes tabata publica esakinan riba medionan social.
Un di e bishitanan di Evelyn Wever-Croes a wordo hopi critica door di oponentenan di AVP, esey ta e bishita na Andre Bosman político di partido VVD di premier Rutte. Bosman ta hopi critico riba e islanan den Caribe, y ta hopi exigente pa loke ta trata bon gobernacion. Bosman y Juan David Yrausquin a discuti abiertamente bastante fuerte riba Twitter. Y semper Bosman a bisa cu si Aruba no kier pa Hulanda mete, anto regla bo asuntonan drechi.
Despues di e reunion cu Evelyn Wever-Croes tabata tin cu Andre Bosman, Bosman a pone lo siguiente riba Twitter:
Goed gesprek met @EvelynMEP over Aruba en hoe goede samenwerking met NL weer inhoud krijgt. Financien op orde prio 1 pic.twitter.com/srHVF97RyV
— Andre Bosman (@andrebosman) September 24, 2014
Kiermeen Bosman aki ta informa cu ela papia cu Evelyn Wever-Croes riba dos tema: e tema di relacion entre Hulanda y Aruba, y finansas publico. Tocante e relacion entre Hulanda y Aruba, cu awor por cierto ta masha malo mes, Bosman a bisa cu e cu Evelyn a papia con pa duna contenido bek na un bon relacion entre Hulanda y Aruba. Tambe Bosman a informa cu el’a papia cu Evelyn cu mester pone orden den e desorden financiero cu AVP a crea, esey mester ta prioridad number 1. Y tur esaki segun Bosman tabata un bon conbersacion.
Ta tristo cu politiconan fracasa di AVP awor kier bisa cu Evelyn a bai papia di independencia. Nan mester comprende cu politiconan di e caliber aki, manera Bosman y Evelyn, ta transparente y no tin nada di sconde, y den e caso aki e mensahe riba Twitter di Andre Bosman ta papia pa su mes.
Expresionnan haci den e articulo aki no necesariamente ta refleha opinion di ArenaPoliti.co