"Tin un majoria di miembro di 2de Kamer di Parlamento Hulandes cu ta haya cu mester introduci un areglo pa atende cu diferencianan di opinion riba interpretacion di Statuto." Esaki ta loke Rene Herde', lider di e fraccion di AVP cu ta na Hulanda awor aki, a declara. Un di e miembronan di 2de Kamer cu mas ta preciona pa creasion di e areglo aki, ta sra. Wassila Hachchi di e partido D66. Siman pasa Rene Herde a reuni exensamente cu sra. Hachchi na Den Haag, Hulanda.
 

Den parlamento Hulandes e tabata un di e miembronan cu ta haya cu gobierno Hulandes no a haci suficiente pa evita e conflicto cu Aruba. Na mes un momento e ta kere cu un "geschillenregeling" lo preveni conflictonan den futuro. 

CRITICO
Wassila Hachchi di D66 y sra. Madeleine van Toorenburg di CDA ta entre e miembronan di 2de Kamer cu a haci hopi pregunta critico na gobierno di Hulanda pa haya sa pakico a actua den e forma cu a haci cu Aruba. Siman pasa Rene Herde' a combersa cu nan tur dos y a discuti con pa sigui traha hunto. Nan ta convenci cu por a evita e conflicto y mester evita repeticion. Den e reunion cu sra Wassila Hachchi a papia riba e forma cu Aruba lo adopta e recomendacionnan di CFT cu ta cuadra cu e maneho cu gobierno di Aruba ya a cuminsa ehecuta. Ta pesey no tabata dificil pa adopta e recomendacionnan. 

FUTURO
Sra Wassila Hachchi ta esun cu a propone pa crea un forma nobo pa miembronan di parlamento di Aruba, Corsow y St. Maarten participa mas directo den debatenan riba asuntonan di Reino cu ta toca e tres paisnan. Den e reunion cu sra. Wassila Hachchi a trata e tema aki. E asunto aki lo wordo elabo den e lunanan cu ta bin.

Mescos cu den reunion cu otro miembronan di 1ste y 2de Kamer, e confiansa cu Aruba lo sali mas fuerte for di e situacion actual, a keda confirma. Tin admiracion pa e recuperasion economico y social na Aruba for di e crisis di 2009. Tin confiansa cu den pueblo di Aruba tin e forsa y determinasion pa cuida tur loke a logra den e ultimo cinco aña y pa surpasa e añanan di reduccion di gastonan di gobierno cu confiansa den futuro. Obviamente Aruba por sigui conta cu sosten di hopi politico Hulandes manera sra. Wassila Hachchci di D66.

Expresionnan haci den e articulo aki no necesariamente ta refleha opinion di ArenaPoliti.co