Durante e reunion di Tripartiet entre parlamentarionan di Aruba, Corsow y Sint Maarten a sali un otro prueba na cla cu Gabinete Eman su intencion ta pa desmantela e refineria. Tabata durante e presentacion di e proyecto di e fast ferry entre Aruba, Corsow y Boneiro cu a sali na cla cu e waf di e refineria lo wordo usa pa e proyecto aki.

Un refineria mas chikito
A puntra e experto, ta con bin e proyecto di e fast ferry ta bin na e waf di e refineria siendo cu e refineria ta bay conoce un reapertura? Segun e experto tur informacion cu e tin ta oficial y ta procedente di APA NV. Segun ela compronde di APA, e intencion ta cu Valero lo traspasa e tereno di e refineria pa Gobierno y Gobierno na su turno lo pasa un parti di e tereno pa CITCO y un otro parti lo bay pa APA cu lo wordo destina pa e proyecto di e fast ferry. Esaki ta un indicacion cu e refineria lo conoce un desmantelacion y lo habri den un tamaño hopi mas chikito. Lamentabel ta cu ningun Minister na Aruba ta splica Pueblo esaki y cu ta te na Sint Maarten nos mester haya informacion di e intencion di Gabinete Eman pa desmantela e refineria.

Fast ferry banda di refineria
E proyecto di e fast ferry pa conecta Aruba, Corsow y Boneiro via lama ta uno bon y necesario. Locual ta preocupa nos ta, si un proyecto asina banda di un refineria ta algo 'safe.' Pasobra e ta conoci cu un refineria tin su peligernan nan cune y pa bin cu un proyecto cu tanto trafico di auto banda di un refineria, na nos parecer no ta un decicion responsable. Mihor lo ta pa destina un otro waf pa e proyecto aki.

Gobierno mester duna splicacion
E ta lamentabel cu Gabinete Eman mes no ta duna informacion riba e proyecto aki y specialmente pasobra e intencion ta pa usa e waf di e refineria pa esaki. E silencio aki ta sirbi como prueba cu Gabinete Eman su intencion real semper tabata pa desmantela e refineria. 

Expresionnan haci den e articulo aki no necesariamente ta refleha opinion di ArenaPoliti.co