Siguiendo desaroyo di proyectonan PPP di acerca mas y mas preocupacion ta keda lanta pensando riba nos digno pueblo. Tin hopi cos ta wordo pinta bunita unda gobierno ta manipulando henter un pueblo cu e strategia di Mike, esta “EMANIPULACION” pero e realidad mes ta keda scondi y pueblo no ta haña oportunidad di debati riba esaki te ora e ley wordo pasa y daño ya ta haci caba. Kico enrealidad ta FDA?  FDA (Fondo Desaroyo Aruba) cual acuerdo a wordo crea entre Hulanda y Aruba na 1999 unda ambos ta deposita placa den e fondo aki pa proyectonan cu ta fortalece un gobierno, entre otro proyectonan di enseñansa, es decir construi school etc. Rapport “Op Eigen Benen” a palabra cu despues di 10 aña Aruba lo para riba su propio pia y e fondo aki lo caduca. Despues a extende esaki te December 2014 pero a bolbe extende esaki ultimo biaha te na final di aña 2016. Pues entrante aña 2017 FDA lo no ta existi mas y mester busca otro alternativa pa paga proyectonan grandi manera proyectonan PPP cu ta den pleno construccion. Hulanda a deposita alrededor di 100 miyon Euro y Aruba 180 miyon florin den e fondo di FDA den transcurso di añanan. Kico realmente mi kier splica awor. Recientemente gobierno di AVP a scoge concientemente pa inicia un cantidad di proyectonan PPP, Public Private Partnership unda proyectonan lo wordo financia pa e contratista y consorcionan cu ta trahe y pueblo lo paga esaki bek den 20 of 30 aña cu interes inclui. Esaki lo no costa Gobierno cash di inmediato pero pueblo si lo paga casi 3 pa 5 biaha e prijs di proyecto ora bo caba di paga den 20 pa 30 aña. Proyectonan manera 4 baansweg, bijbouw Hospital, Watty Vos Boulevard ta ehempelnan di proyectonan PPP. Un ehempel bibo ta Hospital cual lo costa alrededor di 250 miyon florin pa construi e bijbouw pero dia pueblo caba di paga esaki den 29 aña pueblo a paga 990 MIYON florin. Abuso total pa locual bo ta paga y locual bo ta haña. Desde 2018 tur e proyectonan PPP lo ta cla y entrega y e ora ey Aruba mester cuminsa paga “volle pond” di 121 MIYON pa aña pa mas di 25 aña largo. Di e manera aki Mike Eman “EMANIPULANDO” henter un pueblo a pone e carga pisa riba schouder di boso yiunan. Esaki tabata prioridad? Con Mike Eman tin planea pa yega na 121 MIYON aki door cu FDA ya no lo tey mas. Wel Banco Central a haci calculacion y cobrando PUEBLO e famoso TRANSFER TAX di 2.3 promille esaki lo produci e suma aki. Kico ta e BANK TRANSFER TAX? Esaki ta TUR e transaccionnan liber cu ta pasa via sistema electronico di Banco. Pues esun cu ta paga y esun cu ta cobra via sistema electronico of esun cu ta bende y esun cu ta cumpra, Banco automaticamente lo kita TAX di 2.3 promille di cada transaccion y lo deposita esaki riba un cuenta di gobierno. Mi ta masha preocupa cu e desaroyo aki como cu actualmente kisas pueblo no ta mira e consecuencianan pero dentro di poco Aruba of cualkier gobierno di turno lo mester paga pa e aventuranan di Mike y AVP. Straño cu ningun hende den AVP por a lanta voz contra e desgracia aki. Hopi pero hopi placa bao mesa na tur sorto di comisionnan ta core den tipo di proyectonan aki y esey tabata tin prioridad riba e felicidad di pueblo. Digno pueblo Aruba no por carga mas. Bo pen ta Bo salbacion. Den MEP un partido Social Democrata unda e ser humano ta central bo por tin pleno confiansa como e unico alternativa pa salba e pida baranca aki.

Expresionnan haci den e articulo aki no necesariamente ta refleha opinion di ArenaPoliti.co