Pueblo ta warda añas pa yega na un tereno, pero ta bisto cu esnan cu yega na Minister Sevinger su oficina si por wordo yuda per direct. Si banda di esaki bo tin potencial pa sponser partido AVP e ora ey bo tereno comercial por keda regla 'dezerzijds akkoord' den apenas 5 dia. Si bo ta amigo di partido y bo kier un tereno comercial den Caya Betico Croes no ta problema, Minister Sevinger por regle di biaha y cu un rebaho substancial di e prijs di e tereno. Y si ta den area residencial bo kier traha un hotel, Minister Sevinger por facilitabo e cambio di destino di e tereno sin mucho problema y sin worry cu ley. Alomenos ta parce cu si esnan perhudica pa e actonan aki no bisa nada of no bay busca nan derecho via juez, Minister Sevinger lo keda haci fiesta cu tereno di Pueblo. E practicanan coruptivo aki di cual pruebanan a keda publica den prensa no por ta permisibel na nos Pais y ta na su lugar pa Parlamento y e otro instancianan concerni cuestiona y investiga e practicanan coruptivo aki di Minister Sevinger cu tereno.

Te ainda no tin fecha pa Minister Sevinger bin duna cuenta
Nos di Fraccion di MEP a haci un peticion caba na Presidente di Parlamento pa Minister Sevinger wordo yama pa bin duna cuenta na Parlamento, pero te ainda nos no a haya un fecha pa e reunion aki. Si ta asina cu durante tratamento di Presupuesto nos lo dirigi algun pregnuta na e mandatario. Pero mirando cuanto caso ta bin dilanti cu ta mustra riba actonan coruptivo cu tereno publico, ta di sumo importancia pa den un reunion publico apart atende cu Minister Sevinger riba e maneho cu e ta bin ta hibando riba otorgacion di tereno y cambio di destino di tereno.

Aruba no ta un republica di banana
No ta solamente Parlamento, pero instancianan manera Landsrecherche y Ministerio Publico tambe tin e deber di investiga kiko ta pasando cu otorgacion di tereno na nos Pais. Pasobra e senial tin cu wordo manda na comunidad, cu Aruba no ta un republica di banana na unda cu tin ‘un free for all’ y cu Ministernan por haci deshaci cu nos leynan manera nan ta haya ta bon. Ya ta di dos biaha caba cu juez den su veredicto ta dicta cu Minister Sevinger ta zaag na e pianan di e stul di estado di derecho di Aruba. Locual cu e juez ta constata aki ta algo hopi serio mes. E ta prueba di mal gobernacion y ta mustra cu Minister Sevinger ta actuando manera un despota trapando riba derechonan fundamental di e cuidadanonan di nos Pais. Esaki ta practicanan peligroso pa nos democracia y ta exigi atencion y accion di inmediato di e instancianan concerni na nos Pais.

27 januari 2016

Expresionnan haci den e articulo aki no necesariamente ta refleha opinion di ArenaPoliti.co