Awe cu nos ta para dilanti e posiblidad di e reapertura di e refineria, ta momento propicio pa duna un danki grandi na tur hende cu a forma parti di e Accion Ora Cero dilanti di e maingate di e refineria na februari 2015. Ta danki na e corahe demostra e anochi ey, awe nos por celebra cu nos Pais lo por bay conta atrobe cu un pilar mas pa nos economia. Tur participante por sinti nan mes orguyoso ya cu e Accion Ora Cero a brinda su fruto den e lucha pa e reapertura di e refineria. 

Para desmantelacion
Si tabata pa Gabinete Eman e refineria lo a wordo desmantela for di basta tempo caba. E propio Minister Eman a admiti esaki poco dia atras den su speech y nos tur por corda con Minister De Meza a declara na 2015 cu den 2 luna Valero lo cuminsa desmantela e refineria. Pero aki ta na unda cu e Accion Ora Cero a pone precion y a manda e señal cu na Aruba ainda tin hende homber y muher cu ta decisivo pa no laga Gabinete Eman kita for di nos Pais e oportunidad di por conta cu un refineria den operacion. E precion aki a pone cu Gabinete Eman mester a para e desmantelacion di e refineria y duna oido real na interesadonan cu lo kier opera e refineria.

Union y determinacion 
E Accion Ora Cero a demostra cu si nos Pueblo ta uni nos por logra cosnan grandi pa nos Pais. Apesar cu a bin critica cu e grupo no tabata di miles di persona, cu no lo tabata tin hopi hende di San Nicolas mes cu tabata presente, hecho ta keda cu e refineria ta di balor nacional y pesey hende di tur districto di Aruba tabata tin e mesun derecho di forma parti di e Accion Ora Cero. Locual ta importante ta cu cada persona cu nan presencia e anochi ey a demostra e determinacion necesario cu a pone cu awe nos por papia di reapertura di e refineria.

Hunto nos por logra mas 
Laga e Accion Ora Cero sirbi nos Pueblo como ehempel cu ora nos ta den union nos por logra cosnan grandi. Desunion ta haci nos zwak y vulnerabel pa manipulacion di esnan cu no ta stima nos Pais. Si nos ta uni, hunto nos por logra mas. Pabien Aruba y un danki special na tur hende cu a forma parti di e Accion Ora Cero cu a brinda su fruto den e lucha pa e reapertura di e refineria.

13 juni 2016

Expresionnan haci den e articulo aki no necesariamente ta refleha opinion di ArenaPoliti.co