Relaciona cu e tragedia na Orlando Florida 

Tipo di tragedianan asina ta pone nos tur cada bes mas consciente di e importancia pa nos crea un comunidad cu mucho mas tolerancia

ORANJESTAD - Durante un conferencia di prensa semanal di gobierno, Prome Minister Mike Eman, prome cu a cuminsa su parti di e conferencia a para keto riba e sucedido tragico na Merca, Orlando, Florida, diasabra ultimo. "Den nomber di pueblo di Aruba mi kier a expresa palabranan di solidaridad cu e estado Florida, ciudad Orlando y tambe expresa palabranan di solidaridad cu Estadonan Uni. E palabranan di solidaridad ta specialmente pa famia di e victimanan, y esnan cu a sobrevivi e tragedia aki tambe, palabranan di recuperacion."

Diasabra ultimo, na un nightclub na Orlando Florida, un individuo a tira, cu consecuencia cu te awo 49 hende a muri. 53 herido a wordo transporta pa hospitalnan den cercania, Loke kiermen cu no ta descarta cu por tin mas morto den e caso aki. Den e establecimento tabata tin un total di aproximadamente 300 hende. Segun informacion, e tragedia aki, ta esun cu mas hende a wordo mata den un solo incidente na Merca pa un tirado.

"Algo sumamente dramatico cu a tuma luga den fin di siman na Merca, toch ta pone nos tur cada bes mas consciente di e importancia pa nos crea un comunidad cu mucho mas tolerancia, un comunidad caminda cu tin mas convivencia y e sentido di amor prohimo semper ta prevalece riba cualkier diferencia di opinion politico y ideologico cu nos por tin," Prome Minister Eman a enfatisa.

Sr. Eman a splica cu den nan periodo di gobernacion a bin ta accentua e tema aki masha hopi mes. "Trabounan cu nos ta haci den barionan, trabounan cu nos ta haci den Dialogo Social, trabounan cu nos ta haci den Town Hall Meetingnan cu nos ta tene, trabounan cu nos ta haci den parlamento, den gobernacion, ta toch cu un sentido distinto cu nos a conoce den añanan anterior di gobernacion, caminda tabata tin hopi antagonismo pa tolerancia pa pensamento di otronan, gremionan no tabata wordo consulta. Mi ta kere cu esaki ta un responsabilidad hopi importante pa nos tur realisa cu e calidad di bida di nos, alafin, e aspectonan economico aki ta importante, e aspecto di entrada, pa bo tin un bon trabou ta importante, pero finalmente calidad di bida ta wordo determina pa e tipo di sociedad cu nos tin, e sociedad cu ta permiti un sentido di convivencia, un sentido di amor prohimo y naturalmente ora cu nos tin sucedidonan asina, nos ta bin realisa con importante ta pa, los di tur aspectonan economico, nos por keda inculca e aspectonan importante di norma y balornan cu ta haci nos hendenan bon cu un curason pa otro."

Expresionnan haci den e articulo aki no necesariamente ta refleha opinion di ArenaPoliti.co