Durante e conferencia di prensa diaranson ultimo parlamentario di fraccion MEP sr. Glenbert Croes a elabora riba e desaroyo di prijs di crudo y tarifanan di utilidad. Parlamentario Croes a declara lo siguiente: “ Awe 9.07 di mainta prijs di crudo ta 48.38 $ pa bari cual ta e nivel di mas abou den e ultimo añanan. Ta momento pa nos di partido MEP den number di pueblo exigi na gobierno , utilities, web y elmar pa baha prijs di awa y coriente pa pueblo di inmediatamente.  E situacion di December tawata un basta dificil y esaki tur hende por a ripara na e bentanan cu a cai drasticamente di por ehempel kerstboom y klapchi.

Awe nos por compronde dicon WEB y Elmar no ta pone e brandstofclausule mas den bo recibo.Den pasado nos a boga pa elimina e carga aki pa pueblo y no solamente no ilustre rib abo recibo. Ta di lamenta cu antes pueblo por a nota cuanto placa ta bai na brandstofclausule dependiendo di prijs di crudo awor pueblo no por controla esaki mas pasobra e diferencia ta kedando como margen di ganashi pa web y elmar. Pesei nos ta di opinion cu si sigui mantene e prijsnan di utilidad manera cu nan ta awor ta un ABUSO di marca mayor.

Ta iincomprendibel cu e prijs di crudo tawata 150$ y a baha pa 100$ y despues e bolbe baha bou di 50$ y ainda pueblo tin cu confronta e peso inhusto djis pasobra no tin boluntad di parti gobierno pa trece alivio pa e pueblo. Den pasado nos a bisa caba cu esun cu usa menos ta paga menos y awor a resulta cu si bo ta conciento cubo uso tocho bo ta wordo castiga cu un aumento! E vision di green energy lamentablemente a traduci su mes na prijs di awa y coriente halto pa pueblo. Otro  factor cu segun gobierno ta hunga rol ta e “handling fee” cual un tempo tawata 2$ y awor ta 6$. Pesei nos di oposicion ta invita gobierno di Aruba pa forma un bloke cu parlamento di Aruba pa exigi Valero pa elimina e handling fee pa esaki ultimamente por bira un alivio den e tarifanan di coriente pa pueblo, parlamentario Croes a termina.

Expresionnan haci den e articulo aki no necesariamente ta refleha opinion di ArenaPoliti.co