ORANJESTAD - Un noticia cu siman pasa sigur a cai manera un bom tabata na momento cu na e mesun momento cu Parlamento tabata debatiendo cu minister Dowers riba e criminalidad y inseguridad den nos pais, cu poco meter mas pasuit ex lider di AVP tabata purba conbense hendenan den un conferencia di turismo cu Arubianonan ta felis.
Segun un estudio cu Tico Croes ex lider di AVP a laga hasi, 78% di Arubianonan ta felis y cu esaki Mike Eman a haya un otro excusa pa biaha mundo rond pa engaña mundo cu Aruba ta felis.
E estudio cu a costa 250 mil dollar, tabata tin como obhetivo pa determina con "felis" habitantenan di Aruba ta.
Indudablemente 78% di Arubianonan tin e deseo y e meta di ta felis. Pero ni Tico Croes ni Mike Eman por wak nos straight den nos cara y ripiti esey.

Costo di bida halto tin hopi hogar infelis den problema financiero. Problemanan social, especialmente bou nos hobennan, tin hopi hogar infelis y den preocupcion. Y ultimadamente e crisis di insiguridad den nos pais, tin mas di 78% di nos hogarnan den panico. Bo no ta safe mas den bo cas, bo no ta safe mas pafor di bo cas. Bo no ta ni safe den bo auto mas.
Definitivamente mas di 78% di nos cuidadanonan ta mas insigur y preocupa cu nunca antes. Y definitvamente no felis.

TICO CROES, CONDENA PA "TRIKINOMICS"
Ningun hende ta lubida ken ta Tico Croes. E tabata minister di finansas y ta e prome y unico minister cu a wordo condena pa fraude den gobernacion. E tabata "tover" cu cifras pa duna impresion cu cos ta bon mientras e y un tal Otmar tabata horta miyones di caha di pueblo. E tempo ey tabata wordo bisa cu e ta hasi TICO-NOMICS of TRIKI NOMICS! Y pesey el'a wordo condena pa corupcion pero nunca a cumpli cu su castigo.
Y riba dje awor ta wordo paga pa gobierno di AVP pa manipula cu cifras y manipula cu investigacion, pa desvia atencion.

No ta por nada cu e anuncio di Tico Croes y Mike Eman siman pasa cu 78% di Arubianonan ta felis a cai manera un bom den un comunidad ranca for di otro, y cu panico pa su seguridad.

CON ARUBA POR BIRA FELIS BEK
Un mensahe di pueblo di Aruba na Tico Croes y Mike Eman: pa Aruba bira felis bek, nos kier nos helicopter bek. Nos kier e radarnan bek. Nos kier mas polis riba caya. Nos kier trabou pa nos hobennan pa kita nan for di caya. Nos kier control riba prijsnan den supermercado pa prijsnan por baha. Y nos kier pa boso stop e "aventura berde" y hedging pa porfin nos prijs di awa y coriente por baha. E ora talves Aruba por bira felis. Pero awor boso a pasa pa dos ganjado!

Expresionnan haci den e articulo aki no necesariamente ta refleha opinion di ArenaPoliti.co