Den e reunion cu Parlamento a tene siman pasa cu Minister di Histicia, Procuror General, Mando di Polis, hefenan di Duane y Immigracion, di Seguridad Nacional y otro expertonan, fraccion di AVP a urgi gobierno pa usa tur instrumento lega, material, tecnico y informacion pa soluciona e casonan di crimen hororoso cu a tuma luga y pa preveni cualkier caso asina den futuro. Rene Herde': "Sea cu ta den barionan na Aruba, of ta na frontera, nos mester identifica e posibel criminalnan prome cu nan actua y causa dolor inmenso y daño grandi na nos pueblo y na nos pais. Pa esey nos ta urgi y autorisa autoridad di husticia pa usa tur instrumento legal, material, tecnico y di informacion pa preveni tur clase di crimen contra nos pueblo y nos pais. Nos ta un pais cu ta biba den pas y trankilidad. Nos lo haci tur cos semper pa tene asina tambe." Fraccion di AVP a urgi tur e funcionarionan presente pa bisa kico nan falta pa aumenta e efectividad di nan trabou di seguridad. E fraccion di AVP a accentua e efectividad di polis pa mustra cu AVP ta na altura cu polis ya ta haci hopi pa combati criminalidad na Aruba. Pero cu tambe AVP ta na altura cu den henter e circuito di husticia tin espacio pa mehora e forma di traha y asina mehora ainda mas e resultado di nan trabao pa proteha nos pais.

EFECTIVIDAD
Door di pone accento riba e efectividad di tur esnan envolvi den combati crimen na Aruba, e fraccion ta subraya e trabou grandi cu tur e instancianan ta haci pa combati criminalidad. Pero e fraccion di AVP no a keda sin mustra riba lugarnan caminda nan no ta satisfecho. Por ehempel a mustra Ministerio Publico cu e señal cu Ministerio Publico y huesnan ta manda cu e demandanan pa castigo y sentencianan mucho abou, no ta na agrado di Pueblo ni di e fraccion di AVP. Mientras cu Parlamento a aumenta e castigo den ley, ainda e sentencia di huesnan no a cambia. Esey ta causa frustracion den comunidad di Aruba. Esaki ta demotiva tambe esnan cu ta persigui y gara criminalnan. Den esaki sigur e fraccion lo kier wak cambio. E fraccion a hasta sugeri pa Ministerio Publico pa pensa riba formanan pa amplia e tipo di castigo, si no por aumenta e cantidad di aña di castigo. Otro tipo di castigo ta nifica cu e criminal ta sinti e castigo den mas cu un forma.
Pero mas cu tur, e fraccion di AVP kier wak miho intercambio di informacion entre departamentonan, mas y miho identificacion di posibel criminalnan, mas y miho screening di hende cu ta fingi di bin Aruba como turista, door di wak unda nan ta bay keda na Aruba, identificacion mas specifico di hende na Aruba cu a y sa yuda criminalnan, identificaicon di hende na Aruba cu pa motibo di nan comportacion lo por haya nan mes den criminalidad. Asina e informacion acumula aki por wordo usa pa polis riba caya pa vigila e grupo di posibel criminalnan mas y miho. Asina por preveni crimennan di sosode. Pa esaki e modernisacion di e sistema di comunicacion digital mester sosode mas lihe posibel. Rene Herde': " Nos no por sinta riba stoel di polis of husticia pa bisa nan kico pa haci. Nos kier pa nan sa cu nos ta sostene nan completamente y kier yuda nan combati criminalidad den cua forma cu ta miho. Sea cu ta den barionan na Aruba, of ta na frontera, nos kier pa nan identifica e posibel criminalnan prome cu nan actua y causa dolor inmenso y daño grandi na nos pueblo y na nos pais. Pa esey nos ta autorisa funcionarionan di husticia pa usa tur instrumento legal, material, tecnico y di informacion pa preveni tur clase di crimen contra nos pueblo y nos pais. Nos ta un pais cu a biba den pas y trankilidad. Nos lo haci tur cos semper pa tene asina."

Expresionnan haci den e articulo aki no necesariamente ta refleha opinion di ArenaPoliti.co