Un di e puntonan cu a wordo discuti riba dje durante e reunionnan di IPKO tabata e intervencion di Hulanda por medio di un KB na unda cu a haci uso di articulonan 15 y 21 di Reglamento di Ordo di Gobernador. Pa locual ta trata Aruba, e parlamentarionan di AVP a cuestiona e intervencion di Hulanda cu e KB di juli 2014 y por medio di IPKO a busca manera pa por a yega na un declaracion cu Hulanda su intervencion na Aruba tabata robes. Pero e declaracion aki no a bin, ja cu entre otro e parlamentario Hulandes Van Laar a recorda e parlamentarionan di AVP cu e KB pa Aruba no a cay for di shelo.

No ta di awor pero di masha tempo caba Hulanda ta cuestionando e maneho financiero di Aruba y e rumbo cu Gabinete Eman tabata hibando nos finanzas publico, ja cu Hulanda tambe ta lesa e rapportnan di Standard & Poors, Fitch y IMF. Pero como cu finanzas publico ta un asunto interno di Pais Aruba, Hulanda mester a para wak for di un distancia kiko Gabinete Eman tabata haci deshaci. Ta na momento cu Gabinete Eman a cuminsa sera protocolnan cu Hulanda den cual a yega na acuerdonan riba entre otro nos finanzas publico, Hulanda a haya entrada pa cuestiona e manera con Gabinete Eman ta trata cu nos finanzas publico. Hulanda a taha Gabinete Eman cu su maneho financiero no ta sostenibel y ora cu nan a realisa cu Gabinete Eman no ta bay cambia di rumbo, nan a dicidi di interveni. Pues e intervencion no tabata di un dia pa otro y e parlamentario Hulandes tin razon ora ela expresa den e reunion di IPKO cu e KB di Aruba no a cay for di shelo.

Pa e motibo aki no a sali ningun declaracion den cual IPKO ta bisa cu e intervencion di Hulanda na Aruba riba Gabinete Eman su maneho financiero tabata robes. E ta bisto pa tur cu kier wak cu e intervencion aki a wordo activa pa e palabracionnan cu Gabinete Eman mes a haci cu Hulanda y nan mesun mal comportacion financiero.


11 januari 2015

Expresionnan haci den e articulo aki no necesariamente ta refleha opinion di ArenaPoliti.co