Trabounan na entrada di Waf na Oranjestad ta bay mehora producto Aruba ainda mas!

Prome Minister Mike Eman a kita bachi y subi bobcat dialuna mainta pa realisa e groundbreaking cu ta duna inicio na e proyecto di construccion di e Welcome Plaza na entrada di waf di Oranjestad. E mandatario a haci esaki den presencia di Minister di Infrastructura Benny Sevinger y Minister di Turismo Otmar Oduber. E trabou aki ta forma parti di e plan amplio di BoAruba, cu ta inclui renobacion di centro di ciudad y mehoracion di producto Aruba den su totalidad. Den su palabranan na esnan presente incluyendo miembronan di InfraTeam, contratista y prensa local, Minister President a reflexiona con e vision di su Gobierno, awe ta ehempel no solamente den Caribe, pero tambe ta e direccion cu continente Europeo a dicidi finalmente pa sigui.

Na 2009 a hereda un crisis economico y un ciudad capital den estado di deterioro. Na nivel internacional, Aruba tabatin dos ehempel pa sigui den e maneho di crisis, esun Mericano cu ta focus riba stimula e economia dor di inversion y esun Europeo cu a scoge pa austerisacion den tempo di recesion, e mandatario a splica. “Awe mester ta un orguyo pa cada ciudadano cu a para banda di Gabinete Mike Eman I ora cu a opta pa inverti den e economia di e pais, stimula creacion di trabou, mehora producto Aruba y sostene e poder di compra di e ciudadano.”

Instancianan internacional ta duna Aruba rason den e decision cu a tuma. Un ehempel di esey ta Florida-Caribbean Cruise Association (FCCA), cu a expresa na Gobierno di Aruba cu ningun parti den Caribe ta wordo inverti asina hopi den e mehoracion di calidad di e producto cu e turista ta bin haya ora cu ta bishita, manera nos pais ta haciendo. Minister President a remarca cu no ta busca pa complace solamente e turista, pero cu e calidad di bida di e local tambe ta un prioridad. “Naturalmente nos no a haci esaki unicamente pa esnan cu ta bishita nos, pero nos a haci’e pa nos propio ciudadanonan paso nos ta bisa cu un Aruba dushi pa biba, ta un Aruba dushi pa bishita.”

Despues di a cuminsa wak e resultadonan obteni y cu ta den desaroyo na Aruba, Europa a realisa cu tin un miho manera di haci cosnan. Decision politico na Bruselas a wordo tuma pa crea fondo di inversion pa wak con por saca Europa di recesion. Nan mester bay inverti den construccion di infrastructura, scolnan nobo, renobacion di bario como un estimulo di Economia, e decision cu Aruba a tuma cinco aña pasa, asina Prome Minister a splica.

Awe cu nos tin un economia creciente y un turismo creciente, Aruba ta ehempel pa economistanan di con por wanta cabes riba awa den momentonan critico. “Nos ta spera cu pronto nos ta para bek akinan y otro parti di producto Aruba, di e vision cu nos tin pa hiba nos pais na e siguiente etapa di progreso por wordo realisa,” asina nos Prome Minister Mike Eman a finalisa bisando, sin laga afo su palabra di pabien y exito pa tur esnan envolvi den e proyecto.

Expresionnan haci den e articulo aki no necesariamente ta refleha opinion di ArenaPoliti.co