E siman aki a habri Aruba cu inicio di construccion di otro proyecto cu lo beneficia nos pais no solamente como destino turistico, pero tambe pa su pueblo. Riba su fecha natal, Minister Benny Sevinger a compaña colega Minister President Mike Eman y Minister di Turismo Otmar Oduber pa haci e groundbreaking di e Welcome Plaza. E obra aki ta ubica riba L.G. Smith Boulevard na entrada di waf di Oranjestad. Pa e titular di Infrastructura, e proyecto aki ta representa e continuacion di ehecucion di vision Gabinete Mike Eman I y II respalda pa e determinacion di su lidernan, e sosten di pueblo y e resultadonan di nos sector turistico.

BoAruba ta e plan macro cu prepara pa asina, no solamente rescata Aruba di e descuido total cu tabata aden, pero tambe stimula e economia local. Despues di a renoba Caya Principal y varios di su edificionan di importancia cultural, historico y monumental, a yega na beurt pa drecha y embeyece e entrada y salida di nos turistanan crucero. E segmento aki di nos industria turistico a crece danki na e bon trabou di colega di turismo, segun Minister Benny Sevinger y esey ta motibo riba su mes pa continua cu e trabounan. “Cifranan di turismo den ultimo aña a subi y esey ta nifica cu e trabou di renobacion y mehoracion di producto ta dunando resultado y ta treciendo mas bishitante y pesey mester sigui cu esaki,” e titular di Infrastructura a comenta.

Ta bon pa señala adicionalmente, cu un bes cla, Welcome Plaza su diseño ta bay yuda regula e actividadnan comercial den e area. “E renobacion no mester ta solamente fisico, pero tambe den logistica. Taxi y operadornan di tour mester tene cuenta cu movecion di turistanan pa centro di ciudad, tram, kiosk, publico, etc. Tin un plan prepara hunto cu Departamento di Obranan Publico, Aruba Ports Authority y otro instancianan cu poco poco ta implementando,” tabata e palabranan di Minister Sevinger.

Prome cu clausura su turno na e ceremonia di groundbreaking, Minister Sevinger a gradici tur hende cu ta traha den e proyecto aki, esta InfraTeam, DOW, DIP, APA, FDA y Arubaanse Wegenbouw cu ta e contratista encarga. El a bisa: “Ta spera cu tur cos bay bon y segun plan pa na final sigui renoba nos pais cu lo trece mas turista y lo trece mas ingreso. Laga nos cuminsa traha.”

Expresionnan haci den e articulo aki no necesariamente ta refleha opinion di ArenaPoliti.co