Nos ta mira cu cada vez mas Gabinete Eman ta haci uso di e sistema di Private Public Partnership (PPP) pa por realisa proyectonan di infrastructura pa nos Pais. Pero e retonan cu ta warda nos den 2015 y e tempo nos dilanti ta pone cu nos mester duna prioridad na proyectonan cu ta mas na beneficio di nos Pueblo en general cu solamente na beneficio un grupo chikito. Enves di mara fondo publico pa 20 of 30 aña pa realisa proyecto di infrastructura den trahamento di caretera y edificio, nos Pueblo lo por sali mas beneficia si Gobierno inverti den Enseñansa na nos Pais.

Un Pueblo educa ta brinda perspectiva positivo pa un Pais. Enseñansa ta yuda surpasa problema social y ta aporta na un mihor calidad di bida di nos cuidananonan. Si di berdad nos kier logra un calidad di bida di 5 strea pa e Pueblo di Aruba, anto nos mester inverti den enseñansa y no den infrastructura. Edificio y caretera ta caba cu tempo, pero inversion den enseñansa di nos yuinan lo brinda nan fruto pa hopi tempo. Pesey a bira tempo pa Gabinete Eman cambia su rumbo of tuma su retiro ya cu su prioridadnan ta robes y nan no ta logrando pa hisa e calidad di bida ala 5 strea manera nan a priminti.

Un ehempel clave di prioridad robes ta e school pa HAVO VWO cu mester a bin na Noord. Te cu awe e school aki no a bira un realidad debi cu a hinca e fondo publico destina pa e school aki, den un tram pa turista haci sightseeing den Caya Betico Croes. Un inversion cu no a duna e fruto spera ya cu e tram no a yuda hisa compra di turista den nos caya principal. Si e fondo aki a wordo inverti 5 aña pasa den e school na Noord, awe nos lo tabata tin mas hoben educa y forma pa yuda Aruba engrandese su economia. Pa no papia mes di e cuponan di trabou cu un school asina ta crea pa nos maestronan.

Banda di esaki mester menciona cu mester haci inversion den material pa school y e cuido di e chikitonan na cresh y trai merdia. No por ta asina cu tin schoolnan cu na aña 2015 no tin machine adecua pa por sinia nos hobennan un ofishi ya cu e machinenan a bira demasiado biew wardando riba inversion. Aki ta na unda e placa cu ta bay den por ehempel un Green Corridor mester bay. Nos mester realisa cu si por sinia nos hobennan un ofishi nos no mester recuri na busca trahador for di exterior pa haci un trabou cu nos mes tin hende pa haci. E cuido di nos chikitonan den cresh y trai merdia ta importante no solamente pa nan formacion, pero tambe pa e mayornan por traha cu un mente trakil sabiendo cu nan yuinan ta bon cuida. Enves di a inverti miyones den Centro Multifuncional, mester a percura pa cada districto por a conta cu centronan na unda tin cresh y traimerdia di bon calidad y asecibel pa e Pueblo trahador.

Si nos ta hinca nos Pais den debe pa paga 20 a 30 aña largo, anto nos mester inverti esaki den proyectonan cu ta educa nos hendenan y crea cupo di trabou pa tempo largo pa asina un grupo grandi na nos Pais por sali beneficia.

12 januari 2015

Expresionnan haci den e articulo aki no necesariamente ta refleha opinion di ArenaPoliti.co