ORANJESTAD -- Fraccion di MEP a pidi un reunion publico pa minister Mike de Meza bin duna cuenta di e maneho di energia cu ta sin pia y sin cabes.

Un maneho di energia den un pais mester ta dirigi riba brinda e mihor servicio na e cuidadanonan di e pais, pa e prijs mas abou. 
Sinembargo desde cu Mike Eman a tuma mando di e pais aki, e maneho di energia na nos pais a para bira un coi hunga. Algo cu Eman ta usa y malusa na su antoho.

Prijs di coriente mester subi, pa Mike Eman hunga salbador. Pa e por biaha mundo rond conta un storia cu ni e mes ta kere su mes mas. Mientras e ta castiga pueblo cu prijs di coriente halto, e ta malgasta placa di companianan di utilidad cu conferencianan berde, Wubbo Ockels, Richard Brnason, Al Gore.

Pa colmo prijs di crudo ta bahando drasticamente, y segun World Bank ta henter mundo mester ta probechando di e alivio aki. Pero no na Aruba, pasobra na Aruba nos tin un prome minister cu no ta interesa den duna alivio na pueblo, solamente na su mes. Y consecuentemente pueblo ta wordo castiga basta cu Eman por sigi fiesta. Esey ta e motibo dicon fraccion di MEP a manda yama e minister responsabel cu energia pa duna cuenta.

No por ta asina cu mientras cu WEB ta "hedge" pa tene prijsnan fiho, ta HISA prijs, pero no por BAHA prijs! E solucion real pa cu nos problemanan di energia ta e hydro cable, e cable cu ta conecta Aruba cu Colombia, atraves di cual Aruba ta cumpra energia limpi y barata for di Colombia, y asina por baha e prijs di coriente pa nos cuidadanonan. Partido MEP a presenta esaki como alternativa, y ta conbensi cu esaki ta e solucion pa nos problemanan. 

Ta di spera cu presidente di parlamento Marisol Lopez-Tromp yama e reunion aki mas pronto cu ta posibel. Varios reunion cu MEP a pidi den ultimo anja aki NO a wordo yama ainda, probablemente pasobra AVP tin miedo di duna cuenta. Ta bon pa pueblo mes mira y realisa cu e interes di e gobernantenan di AVP NO ta pa duna alivio na pueblo, sino pa duna alivio solamente na nan propio cartera, paosbra pa yena nan saconan e parlamentarionan di AVP si a pasa un ley den 6 minuut.

Expresionnan haci den e articulo aki no necesariamente ta refleha opinion di ArenaPoliti.co