Durante conferencia di prensa di MEP Lider di MEP Evelyn Wever-Croes a toca e tema di e prijs di coriente y e contract di hedging. El’a remarca cu esaki ta e siman cu Minister Mike de Meza mester duna cuenta na Parlamento tocante e contract di heding. Dos siman pasa Minister de Meza a pidi Parlamento dos siman di tempo, y e siman aki pues ta bira e momento di berdad.

“Nos a hasi nos investigacion y a resulta cu e director di WEB no ta autoriza pa firma contractnan di heding sin aprobacion di e hunta di comisario. Pues esun responsabel pa e contract di heding ta e hunta di comisario, y ken ta e hunta di comisario? Gobierno mes! Minister Mike de Meza a bisa Parlamento cu e no sa di nada, awel si e no sa di nada anto ta Mike Eman ta e burdugu anto! Pasobra bo no por tin otro nomber pa un prome minister cu deliberadamente ta sera un contract, cu ta pone pueblo paga DOUBLE di e prijs di coriente. E prijs di crudo ta $48 siendo cu e contract di heding ta mara na $96. Esaki ta un abuso, pasobra a horta pueblo e oportunidad pa haya un alivio den su prijs di coriente. Na tur pais pueblonan ta haya alivio, ta na Aruba so nos tin e malasuerte di tin Mike Eman na cabes di e pais aki, y pesey mester castiga pueblo” segun Evelyn Wever-Croes.


SOLUCION
“Nos no ta un partido di cuestiona so, nos ta duna solucion tambe. Den e caso aki e solucion ta anula e contract. Cualquier clausula di multa cu mester paga hamas por ta mas hopi cu locual ta perhudicando pueblo actualmente. Y riba termino largo e plan di MEP pa bin cu hydro energia ta e solucion real pa e problema aki. Esey ta baha bo prijs di coriente, y mes momento ta energia limpi. E anja aki nos lo sigi traha riba e proyecto aki, pa brinda pueblo e posibilidad di haya un alivio real.

Nos ta spera cu Minister de Meza cumpli cu su palabra y bin Parlamento e siman aki pa duna cuenta. Un hende su cabes mester lora pa e eror garafal aki, y e siman aki nos lo haya sa ta cual di e dos ministernan ta culpable y na mes momento percura pa brinda pueblo un alivio”, lider di MEP a duna di conoce.

Expresionnan haci den e articulo aki no necesariamente ta refleha opinion di ArenaPoliti.co