SANTA CRUZ --  Fraccion di MEP ta trahando riba un proyecto di ley pa duna alivio na esnan cu ta paga nan fiansa di estudio bek. Esaki den forma di un 'aftrekpost' di inkomstenbelasting, pa duna nan un alivio pa e temporada cu nan ta paga nan fiansa di estudio bek.

KIKO E AREGLO AKI TA ENSERA?
E proposicion di MEP ta ensera cu tur esnan cu ta pagando un fiansa di estudio bek, por deduci locual nan ta pagando, te na un maximo di 10 mil florin, pa un periodo di 10 anja. Por dedusi no solamente e interes, manera ta e caso awor aki parcialmente, sino e interes y e 'aflossing' total, mescos cu Corsou a introdusi na fin di anja pasa. E deduccion lo bira un 'persoonlijke last', pues ta completamente deducible, te na maximo di 10 mil florin.

TA CONTA PA FIANSA DI ESTUDIO DI HULANDA SO?
No, e areglo aki lo conta pa TUR fiansa di estudio. Contal cu ta trata un fiansa di estudio, no ta importa unda bo a studia.

E AREGLO AKI TA CONTA PA ESNAN CU CABA DI STUDIA DEN FUTURO?
No, e lo conta tambe pa esnan cu ya a caba di studia y ta pagando nan fiansa bek. Nos ta tratando pa e cambio di ley aki haya forsa retro activo te 1 di januari 2014, pa asina ora bo yena bo aangiftebiljet 2014 aki algun luna, bo por cuminsa dedusi esaki caba.

Tabata tin intentonan den pasado pa crea facilidadnan paresido, pero nan no a concretisa. Fraccion di MEP ta determina pa concretisa e areglo aki mas pronto cu ta posibel. Ta dificil pa pensa cu un persona por ta contra e areglo aki, mirando cu na Aruba tin masha hopi profesionalnan hoben cu ta cai den e categoria aki, y awor mester lucha duro pa paga nan debe di estudio, y esaki ta stroba nan pa cuminsa cu nan carera of negoshi.

"Nos mester di nos profesionalnan bek si nos kier desaroya nos economia, y pesey nos lo hasi tur lo posibel pa bin cu e ley aki, maske nos ta den oposicion", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co