Fraccion di MEP e siman aki a anuncia un cambio di ley cu nan ta trahando riba dje. A referi aki na nan programa di campanja, den cual ta menciona cu mester brinda alivio na esnan cu caba di studia y mester paga nan fiansa di estudio bek.

"Pesey nos a traha riba un cambio di ley, cu ta hasi e pagonan di fiansa di estudio aftrekbaar di belasting, te na un maximo di 10 mil florin pa anja, pa 10 anja. Corsou a caba di introdusi esaki fin di anja pasa, pues, no por tin obheccion di ningun hende pa hasi'e na Aruba tambe.

E areglo aki lo bai conta pa tur esnan cu ta paga un fiansa di estudio bek, dus no solamente esnan cu ta paga e fiansa di Hulanda, pero tambe di gobierno di Aruba of otro institucion cu ta duna fiansa di estudio.

E ta bai conta pa esnan cu termina nan estudio awor, pero tambe pa esnan cu a termina nan estudio caba y ta pagando caba. Nos ta den deliberacionnan cu expertonan pa algun detaye di e ley, prome cu nos entrege oficialmente na Parlamento.

Den pasado tabata tin intento nan pa duna un alivio den forma di e pago di interes, sienbargo nunca e intentonan ey a concretisa, y ademas, nos proposicion ta bai mas leew. Mescos cu na Corsou, nos kier pa full e suma cu ta wordo paga, wordo deduci di belasting.

E areglo aki lo costa placa di belasting, pero di otro banda, e lo atrae nos profesionalnan pa bolbe Aruba bek y asina contribui na desaroyo di nos economia, y di e forma aki e placa di belasting ta drenta bek.

Mi no ta kere cu por tin un politico cu por ta contra di esaki, y mi ta conta cu nos lo haya sosten amplio di tur partido den Parlamento y den Gobierno pa logra pasa e ley aki mas pronto cu ta posibel", Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co