Ministernan Eman y De Meza no por core pa consecuencia di nan vision

For di e feitenonderzoek cu a keda traha riba e problematica di hedging na WEB nos por saca afor cu e meta di WEB pa hedge a wordo cambia pa ehecuta e vision berde di Gabinete Eman. Pesey awe cu cos a bay robes, Ministernan Eman y De Meza no por core pa e consecuencia grave di nan vision. Banda di WEB y Utilities, e mandatarionan aki tambe mester asumi nan responsabilidad.

WEB tabata hedge pa evita subida di tarifa
Ya for di promer cu 2009 WEB tabata usa e instrumento di hedge pa asina por mitiga risico cu e compra di heavy fuel oil (HFO) ta trece cune. WEB su meta cu e hedge tabata pa proteha su mes contra prijsnan halto di HFO, ya cu mas caro esaki ta mas caro e tarifa cu Pueblo mester paga pa awa y coriente ta bira. Pero na 2009 despues cu e hedge no a resulta faboral, WEB a dicidi di stop cu e instrumento aki.

A cambia meta pa stabilisa tarifa
Sinembargo na 2012, e Board di Supervicion di WEB a bolbe bin cu e idea pa por cuminsa hedge y na juni 2012 a cuminsa hedge di nobo. Pero e biaha aki cu un meta diferente, esta hedge pa stabilisa e prijsnan di coriente. Pues no pa evita tarifa halto, sino pa evita cu e tarifa di coriente lo por baha of subi. E meta nobo aki a keda ratifica den e Dialogo Social di energia cu a tuma luga na augustus 2012.

Cambionan den WEB pa implementa vision berde
Den e Dialogo Social aki tambe a bin dilanti e cambionan cu entre otro WEB mester haci pa implementa e vision berde di Gabinete Eman pa por yega 2020 cu sero consumo di HFO. Pa logra esaki WEB lo mester cuminsa entre otro cu e conversion di su makinaria pa bay di HFO over na gas natural por medio di e proyecto “waiste to energy.” Mester remarca cu e conversion aki ta costa basta placa y den un scenario asina WEB mester percura pa por conta cu suficiente entrada pa por tin placa pa cubri e gastonan aki. Un posibel caida di prijsnan di HFO y cune un rebaho substancial di e tarifa di coriente pa Pueblo, lo significa menos placa pa WEB y menos fondo disponibel pa e inversionan berde cu mester a keda ehecuta conforme locual a keda acorda den e Dialogo Social di energia. Pues pa evita cu WEB ta perde entrada, a cambia e meta di hedge pa tene e tarifa stabiel enves di lage fluctua na fabor di Pueblo su cartera manera tabata e meta cu WEB tabata tin promer cu 2012.

No por core pa e consecuencia di e vision berde
Pa cumpli cu e vision berde di Gabinete Eman, WEB a cambia su meta y a tuma risico grandi. E vision aki awe ta perhudicando Pueblo su cartera. Pesey Ministernan Eman y De Meza no por core awor pa e consecuencia negativo di nan propio vision, bisando cu nan no sa di nada. Nan ta e culpabel mayor di e massacre aki.


15 maart 2015

Expresionnan haci den e articulo aki no necesariamente ta refleha opinion di ArenaPoliti.co