ORANJESTAD- Durante tratamento di e presupuesto 2015 tur fraccion den Parlamento a sostene un mocion pa Parlamento bin cu un comision pa hasi tur lo posible pa habri e refineria.

“Awor cu nos compromisonan na Hulanda ta tras di lomba nos lo pone esaki den ehecucion den e Comision di Energia di Parlamento cual ta wordo presidi pa sr. Andin Bikker. Nos ta sinti cu mester hasi un extra esfuerzo pa logra re-apertura di e  refineria, y mescos cu tur parlamentario, nos ta sinti cu ta nos deber pa cu e pueblo di Aruba.

E refineria ta un pilar economico sumamente importante, pa varios motibo. Esakinan ta apenas e tres motibonan principal:

1. Re-apertura di e refineria kiermeen den e prome anja cu nos economia lo crese cu 12%, y cu e cresemento aki no mester di e medidanan cruel cu ta spera nos pueblo. Esaki ta algo cu bo no por logra cu hotelnan so.
2. Re-apertura di e refineria ta trese cupo di empleo mesora pa miles di hende, y no lubida, especialmente pa nos hobennan cu a specialisa den e sector tecnico cu awor na Aruba no tin trabou pa nan, y den turismo nan lo no haya trabou.
3. Re-apertura di e refineria ta e unico forma pa fortifica nos reserva di devisas cu a bin ta bahando drasticamente ultimo anjanan. Turismo su so no por fortifica nos reserva di devisas. Si nos reserva di devisas sigi baha nos florin ta core peliger.

Durante mi reunionnan na Hulanda mi a enfatisa e aspecto aki tambe. Nos ta kere cu por habri e refineria bek y busca un operador serio cu ta dispuesto pa inverti den e refineria, upgrade e producto final pa hasi’e mas atractivo riba mercado internacional, pero mas aun, cu ta dispuesto na cumpli cu standardnan internacional di medio ambiente pa garantisa seguridad di habitantenan di pariba di brug.

Nos tin confiansa cu nos por logra. E lo no ta facil, lo tin desafionan grandi, pero cu e forsa cu ta uni nos tur como Arubiano, nos por vence. Aruba merese mihor, Aruba merese alternativa, no medida. Y pesey nos lo duna tur di nos parti pa logra e re-apertura di refineria” según Evelyn Wever-Croes, lider di partido MEP.

Expresionnan haci den e articulo aki no necesariamente ta refleha opinion di ArenaPoliti.co