Rene Herdé (AVP): E "areglo pa conflicto" lo preveni pa discucion bira conflicto
Mare nos tabata tin'e na 2014 !!
Siman pasa e miembronan di parlamentonan di Aruba, Corsow, Sint Maarten y Hulanda a yega na un acuerdo pa crea un "areglo pa conflicto" (='geschillenregeling') pa tur e paisnan di Reino Hulandes. Esaki ta ensera cu lo bay crea un institucion ancra den Statuto di Reino, pa intermedia y duna veredicto, ora surgi un diferencia di opinion riba interpretacion di Statuto, entre dos of mas pais di Reino. Ehempelnan di esaki ta e caso di no firma e presupuesto di Aruba na 2014 y e intervencion di Hulanda den asuntonan autonomo di paisnan di Reino. E ehempelnan aki ta mustra e importancia di e areglo aki. Si aña pasa e areglo aki tabata vigente, e discucion cu a surgi entre Aruba y Hulanda no lo a bira un conflicto asina grandi. Lo por a evita e tension entre e dos paisnan amigo y e consecuencianan grandi cu e conflicto tabata tin pa economia di Aruba na 2014.
CO'i EXPERIENCIA
No ta semper e 'areglo di conflicto' aki a haya e sosten cu e tin awe. No semper a wak e balor grandi cu e lo tin pa e gobiernonan di e cuatro paisnan di Reino. Den Statuto di Reino cu ya ta existi 60 aña, tin e posibilidad pa crea un "areglo di conflicto". Pero nunca esaki a wordo crea. Ta e Arubiano dr. Mito Croes cu a mustra den su estudio y publicacionnan pakico e 'areglo di conflicto' ta asina importante. Un di e argumentonan pa a crea e areglo aki, ta cu na momento cu paisnan manera Aruba, Corsow y Sint Maarten haya mas autonomia, e posibilidad cu lo por surgi conflicto cu Hulanda lo crece tambe. Esaki a resulta di ta berdad den practica. Rene Herde':"Pero tempo a cambia. Nos tin cinco aña ta warda riba ehecucion di un mocion cu a wordo adopta cu un majoria grandi di voto den parlamento Hulandes. Nos lo mester co'i mas experiencia den e añanan cu ta bin, pa haya sa con bon e 'areglo di conflicto' ta traha di berdad den practica. Politiconan lo siña ki tipo di conflicto (mas) lo por laga soluciona cu e areglo aki y con pa anda cu e veredictonan".
Cu e experiencia aki y e posibel expansion y adaptacionnan den futuro, lo wak con e sostene pa e areglo aki lo crece. Cinco aña pasa e mocion di Juan David Yrausquin y Rene Herde' a wordo accepta den Parlamento Hulandes, pero e resistencia politico na Hulanda contra di e areglo aki, a haci cu mester a warda cinco aña pa yega na un acuerdo na nivel di parlamentonan. Awor ta na gobiernonan di e paisnan di Reino pa converti e boluntad politico aki den un institucion real cu lo atende cu conflictonan concreto. Na juni awor e creasion di e "areglo di conflicto" ta riba agenda di e reunion entre ministernan di Reino na Corsow. Segun Rene Herde' no tin motilbo pa nan no yega na un acuerdo con pa crea e institucion nobo aki. E optimismo den tur pais di Reino ta grandi. Rene Herde': "E lo preveni pa diferencianan di opinion, bira conflicto y pa conflictonan causa problemanan grandi manera a sosode aña pasa cu Aruba. Ta ventaha so tin pa tur pais di Reino. Nos ta contento di por a contribui maske ta un tiki na realisa esaki."
Expresionnan haci den e articulo aki no necesariamente ta refleha opinion di ArenaPoliti.co