Pueblo a cuminsa harta y fada di e show di tur diahuebs mainta! 

Bo por imagina bo mes cu den un pais democratico un Minister President por tin miedo panico pa protesta, welga, demostracion etc.? Aki ta referi na e Minister President Mike Eman cu den e ultimo 5 añanan a viaha rond mundo riba custia di pueblo, unda ni Zuid Africa no a scap’e di haci su bishita. Ta ser calcula cu di 30 dia den un luna, 20 dia Minister President no ta traha. E ta viaha 15 dia pa luna y 5 dia e ta molestia y intimida hende hunto cu un paranda di coordinador, cu tur ta cobra sin traha. Ta ser calcula cu den e ultimo 5 añanan, Mike Eman no a traha ni 1200 dia, pero cu e ta cobra tur luna si mas cu 18 mil florin sin produci net nada pa nos pais.

Degeneracion total
Mirando e abusonan cu placa di pueblo, e cantidad di medidanan cruel, e gran cantidad di coordinadornan cu ta cobra sin traha, e mentira y manipulacionnan, pueblo a harta y fada cu Mike Eman y su partido AVP. Siman pasa na Tanki Flip un grupo chikito di habitante a bay protesta y demostra nan disgusto contra Mike Eman. Enbez cu Mike Eman atende e grupo aki cu respet, den su acto di desesperacion el a manda su coordinador/bodyguardnan, den cual tin un cu den pasado a saca machete pa hende, otronan cu den campaña a maltrata nan contrincantenan politico y sin respet a coba mama, menasa  e hendenan pa dal nan, distrui nan pancarta , mustra nan parti intimo na hende muher etc. Y Mike Eman ningun momento so a para y corigi su coordinadornan. Alcontrario, e tabata bati man pa nan ‘hombresa’. Esaki ta un Ministro Presidente cu a degenera, perde respet pa su mes, cu a falta cu normanan di fatsoen y decencia y a converti nos pais den un di Arubiano contra Arubiano.

Acogida pober
Hecho ta cu e acogida cu Mike Eman a ricibi den e bario di Tanki Flip tabata hopi pober mes y practicamente ningun porta di cas a ser habri pa ricibi e Prome Minister. Tabata solamente dos activista/coordinador raha di AVP bon paga biba den Tanki Flip cu a ‘konkel’ un bishita di Mike Eman na nan cas y pa despues cu yen di fanfaria nan declara cu nan lider a wordo hopi bon ricibi den e bario aki. Nan mester a haci esaki den forma di ‘damage control’, ya cu opinion publico a bay contra di e sinberguenseria di Mike Eman y su coordinadornan cu ta tuma lugar tur diahuebs durante oranan normal di trabao y cu placa di pueblo ta wordo derocha pa e parandanan aki.

Tin tur indicacion cu den otro barionan na Aruba tambe e habitantenan ta cla pa duna Mike Eman y su coordinadornan un ‘bon bini’, mescos cu a sosode siman pasa na Tanki Flip.

Expresionnan haci den e articulo aki no necesariamente ta refleha opinion di ArenaPoliti.co