Durante e biahe realisa na Hulanda lider di MEP sra. Evelyn Wever- Croes a reuni cu director di Arubahuis sr. Alfonso Boekhoudt pa papia riba diferente temanan di importancia cu ta regarda e bida di nos Arubianonan na Hulanda. Ta asina cu tin famianan Arubiano  y studiantenan  ta pasa den problema y  Arubahuis na su lugar ta hasi su best pa atende tur e casonan aki. Lamentablemente ainda tin hende na Aruba cu ta pensa cu ta facil pa muda bai Hulanda. E creencia cu biaha bai Hulanda lo trece cambio positivo ta uno eroneo, pasobra e no ta asina facil pa haya trabou, uitkering of cas. E Hulanda di awe no ta mescos cu esun di 20 anja pasa unda cu e sistema social tabata acomoda mas hende cu ta posibel.  

SEGURO DI STUDIANTE

“Un otro tema cu nos a atende tawata e seguro di studiantenan na Hulanda caminda cu e director di Arubahuis a reconose e problemanan cu studiantenan ta pasa aden. Den reunion cu varios studianten, nan a comparti nan preocupacion pa cu e seguro nobo. E studiantenan tin un carnet di carton, y ora di bai dokter no ta wordo acepta y reconoci pa por haya trato medico pasobra e dokternan no conoce e compania di seguro ey. Tin cierto cosnan no ta wordo cubri y un ehempel simple di esaki ta e beugel cu no ta cai den e seguro. For di combersacionan teni cu diferente studiante nos por a compronde cu esaki a pone cu algun di nan a te hasta bai busca seguro adicional. Ta di lamenta cu djis aki tur studiante ta pagando 2 seguro pasobra gobierno di Aruba a hasi un mal decision.

En conexion cu e caso di seguro nos lo keda monitor e desaroyo di serca y tambe comunica directo cu sr. Boekhoudt pasobra mester yega na un solucion mas pronto cu ta posibel. Remarcabel ta e hecho cu e rol di Arubahuis den e asunto aki mes tawata limita pasobra ta gobierno a regla esaki y aparentement e tawata uno cu a perhudica  e studiantenan mas cu e la yuda”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co