Ya pa algun dia politiconan di AVP a cuminsa cu un campanja di atale contra Parlamentario Bosman di Hulanda. Tur cos a cuminsa cu Desiree Croes y Otmar Oduber cu a considera Bosman como rasista!
No a falta pa mas, pa e corant 'Awe Mainta' tambe a sigi cu e wega sushi ey. Parlamentario Andre Bosman a expresa su desgusto pa e forma con e corant aki ta hasi periodismo. Pasobra awor tur hende kier crea e percepcion cu ta MEP a bai conta Bosman storianan di indian cu cos ta malo na Aruba.

Andre Bosman den su reaccion riba Facebook a duna di conose cu e ta compronde e presupuesto di pais Aruba perfectamente y e conose e problemanan financiero hopi bon. Ningun hende mester cont'e nada pa e por mira e mal maneho financiero cu a wordo hiba.
Mas alew Bosman a duna di conoce cu e ta conbersa cu hopi hende irespecto ken nan ta. Asina e tin contacto tambe cu Baba Herde y Juan David Yrausquin. Ataca hende pasobra nan ta papia cu otro, ta un muestra di un estupidez inimaginable. Obviamente tin un temor pa transparencia of hendenan no kier of no ta durf di bai den debate.
"Mi porta y mi telefon ta habri por tur hende. Esey ta bon pa tur partido. Ami no tin nada di sconde y hendenan sa pa kiko ami ta para. Cu gusto mi ta delibera cu tur hende cu no ta di acuerdo cumi, ami ta sinja di esey y ohala ta mescos pa esun cu mi papia cune.
Demonisa hende y te ey nos ta yega.
Durante IPKO nos a papia di integridad. Lo ta bunita si corantnan y periodistanan tambe hasi algo al respecto. Tur hende ta liber pa no ta di acuerdo cumi, pero lastra hende faltando tur respet no ta pas den Reino".

Expresionnan haci den e articulo aki no necesariamente ta refleha opinion di ArenaPoliti.co