Durante campaña di 2013 partido MEP a menciona esaki dia den dia afo, pero e disordo di e campaña di defamacion di MEP door di AVP a tapa tur locual ta berdad y importante. Awor, dos aña despues... E berdad ta sali. CFT, CaFT, presupuesto y tur e medidanan di AVp ta muestra di tur e mentiranan di AVP. E berdad ta cu AVP no a traha ningun cas Social y door di esey no tin sufficiente cas pa esnan cu mester di nan. Esey ta causa pa muchanan biba den situacionnan menos agradabel te cu situacionnan inaceptabel. Despues Voogdijraad ta drenta y ta dicidi a nase di e situacion, cu lo ta mihor pa duna e muchanan un mihor hogar na p.e. Imeldahof. Pero pa kita e muchanan di nan famia, no ta e solucion, pasobra e famia no ta e causa di e problema. Ta un problema logistico, causa door di e mal maneho di AVP. Nos communidad te crece, ponreca ta subi, pues e necessidad di casnan Social tambe ta crece.

E caso cu a pone mi atencion riba e situacion penoso aki na Aruba, ta esun di e mama cu ta cuida 7 yiu/nieto. Casi 3 siman a pasa y ainda falta pa e mama aki haya un cas. Biento a lanta dak di e cas, laga nan sin dak y sin coriente. Despues a sali cu no tin ningun shelter pa famianan cu ta haya nan mes den un situacion asina. Rode Kruis ta yuda solamente entre e oranan di 10pm te cu 7am. Esey ta nifica cu henter dia bo lo mester zwerf riba caya cu bo famia? Esey no por! Pero esey ta e realidad aki na Aruba. Esey ta e efecto di e supuesto Bon Trabou di e Gobierno Malo aki. Awor ta keda na pueblo mes pa yuda otro, pasobra AVP no ta percura pa nos communidad ta haya e ayudo social cu ta necessario. Durante tur e añanan cu AVP ta Goberna y e gobernacionnan den pasado, AVP no a traha NINGUN cas Social. Tur cas Social a wordo traha door di Gobiernonan di MEP. Awor ta keda na pueblo pa wak si nan kier ofrece esnan den necessidad un dak pa drumi bao di dje of solamente e klinkernan di AVP pa drumi riba dje?

Ban spera cu e mama aki por lo pronto lo haya un hogar caminda e por biba tranquilo cu su yiunan. Ami ta contento cu mi por a yuda. Mi a haciele cu mil amor, no pasobra mi ta un politico, pero pasobra ami tambe ta un mama, un mama soltera. Mi por imagina mi mes con e lo por ta ora bo no por ofrece bo yiunan e seguridad di un hogar. Riba dje como juffrouw di scol mi sa cu cualkier situacion na cas lo refleha riba e resultadonan academico di un mucha. Nunca ningun mucha merece pa bira victima di un situacion asina. P'esey, ora Gobierno ta falta pueblo, ta nos mes tin cu cuida otro. It takes a village to raise a child!! Aruba tin un pueblo humilde cu ta percura pa yuda su prohimo! Pero e responsabilidad final ta den man di Gobierno. Mike Eman su Gobierno no ta cumpli cu e exigencianan di Bon Gobernacion, ni financiero ni social. Aruba y pueblo di Aruba merece mihor!~MSJ

Expresionnan haci den e articulo aki no necesariamente ta refleha opinion di ArenaPoliti.co