Valero a “fix” un deal pa de Meza di 65 mil florin, y de Meza a “fix” un deal pa Valero di 70 miyon florin?

E maneho cu gobierno actual tin cu kier cobra belasting atrasa ta uno inhumano pasobra caminda cu mester a cuminsa ta na e “big fishnan” y esnan cu a haya miyones di florin na kwijtschelding. Sinembargo gobierno a dicidi pa castiga pensionadonan  y e homber chikito pa colmo cu debenan cu a caduca dia bieuw. “Na varios ocasion mi a trece esaki dilanti y cuestiona e maneho desproporcional aki. Durante tratamento di presupuesto tambe mi a hasi varios pregunta cu no a haya un contesta. Mi a recorda e minister di finansas cu cobramento di belasting ta su deber y responsabilidad pero mester a cuminsa na su compinchinan y financiadornan di campanja, y su colega minister de Meza, cu a haya dispensacion di belasting, y no cuminsa serca e homber chikito, e pensionado cu apenas por biba cu e pensioen di biehes. Ora cu mi a trece tur esaki dilanti y no a haya contesta durante tratamento di presupuesto mi a dicidi pa cuestiona esaki atrobe por escrito, pasobra mi ta keda insisti te ora mi haya un contesta. Como parlamentario, hasiendo uso di mi derecho constitucional, mi a dirigi preguntanan na ministernan Bermudez y de Meza. E preguntanan cu nos a hasi ta entre otro: cuanto ta e suma total na belasting cu ta riba caya, berdad e ta 4 miljard florin, mes hopi cu nos debe nacional? Con por ta posibel cu tin 4 miljard florin riba caya y bo kier cobra e anja aki 81 miyon florin? Adicionalmente nos a pidi pa nos a wordo informa tambe cuanto di e debenan aki por wordo cobra ainda, cual parti di e suma ta realistico y cualnan a vence. Pa loke ta trata e maneho relaciona cu ‘kwijtschelding’ tambe nos a hasi pregunta. Nos a puntra si e compania cu te cu poco tempo tabata di Minister de Meza cual ta MEM consultancy, a haya dispencion di boet y debenan di belasting. Y nos a puntra tambe cuanto compania mas a haya e tipo di ‘kwijtschelding’ miyonario aki. Nos a pidi pa e preguntanan hasi wordo contesta mas pronto cu ta posibel y a adverti cu nos tin documentonan y prueba cu ta duna nos e impresion cu cosnan no a bai manera mester ta, pero nos kier duna e minister un chens pa e por sali cu e berdad. Ta netamente pa e motibonan aki nos a hasi un cuestionario pa cuestiona e accionan iregularnan aki.

PORCO
Ora e berdad dal duro, hendenan ta perde cabes, y ta tristo pa mira cu Minister de Meza a perde cabes y a rebaha su mes asina tanto pa insluta mi, yama ami pa porco. Dicon e minister ta haya cu mi ta porco? Pasobra ami a simplemente hasi mi trabou durante tratamento di presupuesto, y despues atraves di un carta pa Minister. Cu Minister de Meza no ta gusta mi forma di traha, ta algo cu ta core pa su riesgo. Ami sa si cu tur e insultonan aki di minister de Meza no ta bai strobami pa keda hasi mi trabou y cuestiona loke ta incorecto. E ta un abuso ora cu gobierno kier ranca 81 miyon florin di e pueblo humilde, mientras ta duna su minister dispensacion di belasting! En todo caso, ami lo no rebaha mi mes na su nivel, di insulte pa cualquier cos, mi ta kere cu e mes a demostra su nivel!

PRENSA
E rol cu cierto “miembronan di prensa”, liga na gabinete Mike Eman, a reacciona, tambe tabata remarcable. Durante ultimo lunanan mi a bin ta cuestiona e asunto aki regularmente, pero e miembronan di prensa ey nunca kier a follow up. Ora mi a cuestione durante tratamento di presupuesto, tampoco. Nan kiermeen cu e tratamento tabata demasiado largo pa nan por a sigi tur cos. Pero un prensa hulandes, De Telegraaf, cu SI a sigi e debatenan den Parlamento y cu SI a publicva al respecto, a pone e “mjiembronan di prensa” ey bira nervioso y cuminsa ataca ami. Un biaha mas bo ta mira e nivel di e miembronan di prensa ey, liga na Gobierno. Danki Dios na Aruba tin otro miembronan di prensa cu si ta keda critico, no solamente contra oposicion, pero tambe contra gobierno.

MINISTER DE MEZA MESTER DUNA CUENTA
Minister Mike de Meza mester duna cuenta kiko a pasa den e “deal” aki. Pasobra den su prome reacciona, bastante emocional por cierto dunando asina tur indicacion cu e tin cos di sconde, e minister a declara cu ta Valero a fix un “deal” p’e pa 65 mil florin. Esey ta trese e sigiente pregunta: acaso ta pesey un anja despues minister de Meza mester a “fix” un deal di dispensacion di 70 miyon florin pa Valero"? Mi ta contento cu por lo menos e articulo den De Telegraaf a pone e minister reacciona, pero awor e mester contesta e preguntanan hasi por escrito. Mes liher cu el’a core reacciona na prensa, e por reacciona tambe pa Parlamento. Mi ta sigi spera e contestanan di e minister, y un biaha mas, djis corda cu mi tin documento, pues por fabor, no bin ganja mi atrobe!

Expresionnan haci den e articulo aki no necesariamente ta refleha opinion di ArenaPoliti.co