Cosecha den un edificio monumental na Zoutmanstraat 

Minister Oduber ta cualifica e dia unda a inaugura Zoutmanstraat 1 como un dia remarcabel. No solamente ta celebra inauguracion di e edificio monumental, pero cu porfin por celebra e apertura tan spera di galeria 'Cosecha'.

Durante e ceremonia oficial Minister Otmar Oduber a hiba palabra y a inicia su discurso bisando: “Artesanonan pabien! Boso trabou no tabata envano y awe nos ta celebra boso esfuerso pa hiba arte y cultura dilanti.” Ta bon pa remarca cu e funcion di galeria Cosecha ta bay mas leu cu bende producto. E ta pone nos artesanonan riba un plataforma nobo na unda cu arte y cultura ta wordo combina cu comercio. Nos localnan ta wordo brinda e oportunidad pa sostene arte local y realisa mas ainda cu nos cultura y nos identidad ta lo cual lo hiba nos dilanti. Turistanan cu ta bishita nos isla lo wordo brinda un experencia nobo y autentico. E mandatario ta sigui: “Admiracion y respet pa productonan local,  ta esey ta excelencia cultural.”

Sr. Oduber a haci un apelacion na partnernan den sector priva pa reconoce e balor di arte y cultura y sostene e sector aki. Sosten den forma multifacetico incluyendo fondo pero tambe experticio y oportunidad. Un ambiente na unda bienestar di sector cultural ta responsabilidad di un y tur.

Tur artesano cu a pasa den e proceso na Departamento di Cultura pa haya nan derecho di seyo por forma parti di e galeria Cosecha. Como parti di e plataforma cu a wordo crea pa nos artesanonan, den transcurso di fin di aña, den nos Capital di Herencia Cultural San Nicolas, lo habri su portanan un area di trabou, yama ‘workshop space’. Aki artesanonan cu no tin un area adecua pa por traha y produci, lo por tin un area disponibel pa nan. Un area unda publico tambe por cera conoci cu nan, nan forma di traha y mas importante nan productonan. Tambe lo transforma e area di ex-Promenade den un caya di arte y cultura. Fin di e aña aki e prome museo 'Industry Museum' lo habri su portanan, sigui pa 'Community Museum' otro aña. Artesanonan lo ta esnan cu lo experiensa e transformacion y progreso aki. Ta esey ta excelencia cultural!

Minister Oduber ta termina bisando: “Excelencia Cultural ta e promesa pa nos futuro, ban Cosecha!”

A gradici partnernan clave manera Aruba Ports Authority NV cu a sostene e proyecto di Cosecha y Fundacion C.R.A.F.T. cu a traha hopi duro pa haci e dia aki un realidad.

Expresionnan haci den e articulo aki no necesariamente ta refleha opinion di ArenaPoliti.co