Minister di Hubentud, drs. Paul Croes: Nacionnan Uni y Gabinete Mike Eman ta coincidi riba importancia pa hobennan ta activo civicamente
ORANJESTAD – Den cuadro di celebracion di Dia Internacional di Hubentud, Minister encarga drs. Paul Croes hunto cu Minister President Mike Eman a tuma un momento pa analisa riba e esfuersonan haci dor di Gobierno. A tuma nota cu e enfoke cu Gabinete Mike Eman a bin ta duna durante ultimo seis aña, ta e mesun cu Nacionnan Uni a scoge pa e aña aki, esta Participacion Civico di Hubentud of Youth Civic Engagement.
Minister Croes a señala cu hubentud ta forma un di tres parti di nos poblacion y como tal ta representa un recurso hopi importante den cualkier meta cu nos como pais, ta pone nos dilanti. “Aruba no ta keda atras den esaki y tin diferente programa cu a inclui den e nota di maneho cu ta papia y mustra specificamente kico ta e meta pa alcansa, esta e formacion di e proximo generacion di nos pais.”
E titular a menciona varios proyecto cu Gabinete Mike Eman a bin ta implementando manera Formacion Social, Leerwerktraject, Feria Social, Naschoolse Opvang, como tambe Hoben y Talentoso y Poder di Hubentud. Asina mes, Gobierno ta busca pa haci mas pa nos hobennan.
“Nos kier pa hobennan ta participativo den sector social y enseñanza y tambe encurasha nan pa participa mas den aspecto cultural y deportivo, como tambe tur otro sectornan di nos pais,” asina e mandatario a bisa.
Recientemente a culmina e proyecto di Feria Social caminda ta trata y motiva encurasha hobennan pa participa na trabounan den fundacion y departamentonan social cu trabou boluntario. “E idea ta pa inculca e consenshi social, e simia social den e curason di cada un di nos hobennan.”
Durante e conferencia di prensa ofreci diaranson mainta, Minister Croes y Minister President Eman a papia tambe di e diferente hermentnan di sosten financiero cu Gobierno ta ofrece como ayudo na famianan di menos recurso cu tin mucha y hoben atendiendo scol.
Expresionnan haci den e articulo aki no necesariamente ta refleha opinion di ArenaPoliti.co