ORANJESTAD - Trabou pa pueblo nunca ta caba y Minister President Mike Eman ta ehecuta su responsabilidad cu e mesun dedicacion cu e prome dia di su Gabinete. Pa chikito cu nos isla ta, tin ainda caya y bisindarionan cu Prome Minister no a logra yega ainda. E clamor di e pueblo pa haya su bishita y atencion ta asina grandi, cu e ta hay’e ta bay bek na un bario, manera ta e caso cu Madiki. Algo cu, por cierto, e mandatario ta haci cu hopi animo; mescos cu na tur otro bario di Aruba.

Di su banda, e cayanan den Madiki cu Premier Eman a bishita diahuebs mainta durante Accion di Bario di e siman aki, a aprecia masha hopi e atencion cu nan a haya di parti di lider di Gobierno. Hunto cu Bus di Salud, Serlimar, Gele Koorts Muskietbestrijding y BoBario, el a cana den Rudolf Arendstraat y cercania bishitante diferente cas y combersando directamente cu e habitantenan.

Manera ta conoci, Gabinete Mike Eman a sa di duna e sector aki di nos comunidad e oido pa nan necesidadnan. Asina, Madiki parti Zuid a keda embeyece cu caya, trottoir y matanan masha bunita. Mescos ta e caso cu un parti di Madiki Noord. Awo falta tambe un parti pabou cu sigur ta riba e lista di barionan pa renoba di Minister di Infrastructura y Departamento di Obranan Publico.

Cu un efecto mas inmediato, e Accion di Bario ta un programa den cual Prome Minister Mike Eman ta yega directamente cerca e ciudadano pa brinda su tempo, oido y atencion. E ta un oportunidad den cual por papia riba e desaroyo di e bisindario, kico mester, kico por wordo mehora y cu esey haci e bida di un y tur mas agradabel. Di e manera aki, Minister President ta haya un feedback directo di con pueblo ta opina di e gestion di su gobierno te awo.

Hopi biaha e intercambionan ta bay den direccion di e necesidad di hopi bario na Aruba pa iluminacion publico, caminda di asfalt, trottoir, pero tambe un luga pa muchanan por recrea of haci deporte. Ciudadanonan ta probecha pa bin cu casonan personal dilanti pa cual e mandatario y personal di su Ministerio sa di guia nan den ki direccion mester cana pa atende nan asuntonan.

Serlimar t’ey pa yuda den e limpieza general di e bario, pero tambe ora cu un bisiña tin mester di benta articulonan grandi afo y no tin manera pa haci esaki. Hopi biaha ta trata di hende grandi of cu no tin e vehiculo adecua pa haci esey su mes. GKMB ta pasa controla criaderonan di sangura, pero tambe ta papia cu e habitantenan pa educa nan riba aspecto di prevencion. Bus di Salud ta para na un caminda central di e bario cu ta bishita pa asina un y tur por yega pa controla nan presion, peso, sucu, entre otro.

Na Madiki, mescos cu e otro luganan den e lista largo cu Premier Mike Eman a yega di bishita, e reaccion pa su presencia ta uno sumamente positivo. Hendenan ta habri porta di nan cas y yam’e bon bini. Nan ta contento di tin como lider di nan pais, un persona asina humilde y sincero. Otronan ta expresa nan satisfaccion y ta pidi pa Señor colma Premier Eman y su ekipo di trabou cu hopi bendicion pa por continua cu e obranan na beneficio di Aruba y su pueblo.

Expresionnan haci den e articulo aki no necesariamente ta refleha opinion di ArenaPoliti.co