Rene Herdé (AVP): "Pura. Bay Texas" - Mensahe na tur esnan cu tin compania cu kier habri refeneria
Den conferencia di prensa di AVP e lider di e fraccion a manda un mensahe na tur esnan cu ta pronk cu carta y cu abogado den corant, bisando cu nan si tin compania cu kier cumpra of habri y opera e refeneria. Ela bisanan:"Pura. No warda mas. Bay Texas serca e doñonan di e refeneria mes ora. No warda mas. No tarda mas. E doñonan di e refeneria ta Valero y cualkier abogado cu ta bisa cu e tin cliente y e tin carta di compania cu kier habri e refeneria, mester por sa con pa yuda su cliente y dun'e e adres corecto. Valero su oficina principal ta na Texas. No na Oranjestad!"
Cu e mensahe bon cla aki Rene Herde ta bisa esnan cu ta cana rond cu carta y storia cu nan si por habri e refeneria pa actua y stop di papia. Rene Herde a sigui splica pakico e ta urgi nan pa pura bay serca Valero na Texas. Rene Herde: " Ta ken no kier habri un compania cu por crea 1500 cupo di trabou bon paga y duna hobennan Arubiano un carera tecnico na Aruba mes? Ken no kier por lo menos 100 miyon florin extra den circulacion den nos economia? Ken no kier por lo menos 450 miyon florin extra na divisa pa Aruba? Ken no kier mas cu 100 miyon florin extra na entrada pa gobierno, sigur si bo sa cu e placa ta bay bek pa pueblo manera a sosode e ultimo cinco aña contrario na e ocho añanan anterior bou gobierno di MEP". Rene Herde a sigui bisa kico tur a haci for di october 2009 pa habri e refeneria. Ora a logra un acuerdo pa e habri, e partido MEP a vota contra pa e habri. E lider di MEP a bandona sala di parlamento pa no mester vota mes. Ora e refeneria a bolbe sera na 2012, gobierno y miembronan di parlamento di AVP a bay Mexico, Brazil, Colombia, Merca, Vanezuela, Trinidad y a ricibi un cantidad di compania cu a bisa di kier habri e refeneria atrobe. Gobierno a trece Valero y PDVSA hunto aki na Aruba. Gobierno a ricibi y a intermedia pa Petrochina cumpra of opera e refeneria. Lamentabelmente niun di e companianan aki a logra habri e rerefeneria. Pero si awe ainda tin compania seriamente interesa, nan mester papia cu e doñonan di e refeneria. "Di banda di nos en todo caso nan tin sosten." Asina Rene Herde a finalisa.
Expresionnan haci den e articulo aki no necesariamente ta refleha opinion di ArenaPoliti.co