Craig Hawke, consehero principal di UNDP riba Small Islands Developing States. 
Prome Minister Eman por trece e momentum politico y contribui cu experiencia di Aruba. 

ORANJESTA – Como parti di Reino Hulandes, Aruba a forma parti di un delegacion cu a asisti na varios reunion di importancia pa Reino, pero tambe pa Aruba en particular. E reunionnan den nan majoria a tuma luga na e compleho di Nacionnan Uni na New York. Un reunion di importancia pa Aruba cu Prome Minister Eman a tuma parti na dje ta un sesion riba e tema 'Developing Finance' di UNDP (United Nations Development Programme) conhuntamente cu OECD (The Organisation  for Economic Co-operation and Development) specificamente pa Small Island Developing States (SIDS).

Craig Hawke ta consehero principal riba SIDS pa UNDP, tabata presente durante di e reunionnan na Nacionnan Uni y na su conclusion hopi entusiasma con e reunion a bay. Sr. Hawke a splica cu “e reunion aki tabata pa fortalese visibilidad di retonan di paisnan chikito pa logra acceso y mecanismonan innovativo financiero.”

Small Island Developing States (SIDS) ta paisnan chikito cu tin hopi reto y desafionan similar cu otro. Islanan den nan mayoria tin populacionnan creciente, desafio pa motibo di distancia for di centronan di polulacion grandi, ta susceptibel pa eventonnan natural, vulnerabel pa 'shocknan' externo, dependencia grandi na comercio internacional y medio ambiente fragil.

Crecemento y desaroyo di e paisnan chikito ta wordo afecta tambe pa costo relativamente halto di comunicacion, energia y transportacion, volumen di transporte internacional iregular, administracion publico y costo di infrastructura desproporcionadamente halto debi na nan grandura y practicamente no tin oportunidad pa crea economianan di scala (economies of scale).

E consehero di UNDP a expresa cu nan tabata hopi contento di por a conta cu presencia y contribucion di Prome Minister Mike Eman den e encuentro. “E por trece momentum politico riba e temanan, pero tambe contribui cu experiencia di Aruba den termino di e miho practicanan.”

No ta prome biaha cu Prome Minister Eman a reuni cu UNDP of SIDS. Aña pasa e tabata e orador principal di e prome conferencia grandi di SIDS despues di 10 aña cu a tuma luga na Samoa. E experiencia di e mandatario y Aruba ta loke cu UNDP kier uza como ehempel pa e otro miembronan di SIDS, esta pa nan adopta y implementa un vision amplio di sostenibilidad similar na loke Aruba a scoge p’e. “Nos ta mira Aruba como un bon pais, cu e miho practicanan di sostenibilidad, cu ta compronde e caminda pa cana y logra cambionan positivo den nan desaroyo. E participacion di Prome Minister Eman den e encuentro ta parti di e 'partnership' cu UNDP kier logra cu Aruba.”

E vision di Aruba riba tereno di sostenibilidad ta algo hopi 'excitante' den termino di sostebilidad, 'being green', economia, energia renovabel y con pa haci turismo sostenibel. “E ta exactamente e tipo di asercamento pa cu desaroyo di metanan sostenibel,” Hawke a duna di conoce.

Expresionnan haci den e articulo aki no necesariamente ta refleha opinion di ArenaPoliti.co