ORANJESTAD – Aruba y Prome Minister Mike Eman ta e 'role model' pa miembronan di 'Small Islands Development States' (SIDS) y durante e encuentronan cu ta tumando luga for di siman pasa na Nacionnan Uni, New York, hopi di e dignatarionan di e Estadonan aki ta busca nan colega di Aruba pa combersa riba temanan di comun interes.

Prome Minister Eman den e biahe aki a wordo compaña pa ex-Minister Plenipotenciario di Aruba na Washington y actualmente consehero di gobierno, Jocelyn Croes. E tabata presente den tur e encuentronan y a mira e respet grandi cu lidernan di islanan rond mundo tin pa Prome Minister Eman.

“E meta principal di e reunionnan aki ta pa demostra e avancenan cu nos ta logrando riba varios tereno, principalmente riba tereno di energia renovabel, y comparti conocemento riba otro terenonan di interes,” sra. Croes a splica dunando un resumen breve di e cantidad grandi di encuentronan den cual e delegacion di Aruba ta participando den dje.

Durante tur e encuentronan aki, Prome Minister Eman a probecha pa haci invitacion na miembronan di SIDS pa participa den e proximo 'Green Aruba Conference 2015' y na mesun momento a anuncia cu Nacionnan Uni a eligi Aruba como e sede pa un conferencia di Private Public Partnership (PPP), cual evento lo tuma luga na inicio di otro aña. E conferencia aki por wordo considera un “follow up” di e Conferencia di SIDS cu a tuma luga aña pasa den luna di augustus na Samoa. E conferencia di 2016 lo ta uno cu Nacionnan Uni ta haci den cooperacion cu Aruba.

E partnership entre Nacionnan Uni y Aruba, bou iniciativa di Prome Minister Eman, no solamente ta bay trece e conferencia grandi di otro aña, pero tambe UN kier crea un Centro di Conocemento (Centre of Excellence) cu oficina na Aruba cu ta un plataforma virtual via cual Aruba por comparti su conocemento riba tereno di sostenibilidad y den sector di turismo, PPP, y energia renovabel.

El a splica cu Prome Minister Eman den diferente encuentro a mustra riba e aspectonan cu ta uni e miembronan di SIDS pa cual ta necesario traha hunto, manera retonan comun di e cambionan climatico, vulnerabilidad riba tereno economico (cierre p.e. di un refineria ta afecta un pais chikito hopi mas pisa cu un pais grandi). “Nan ta trata di yega na puntonan comun y logra un posicion comun pa mira con por haci cu paisnan chikito, manera nos, ta haya mas atencion mundial y mira di forma diferente door di institucionnan manera IMF y Banco Mundial. Nan no por considera nos di e mesun forma cu paisnan grandi.”

Sra. Croes a splica cu Prome Minister Eman a tene varios reunion bilateral cu paisnan SIDS entre nan Tuvalu, Palau, Trinidad Tobago y Bahamas.

Expresionnan haci den e articulo aki no necesariamente ta refleha opinion di ArenaPoliti.co