“Après moi le déluge”, hasi y deshasi y laga caos y destruccion pa esnan cu bin despues 

STA CRUZ – Durante conferencia di prensa di MEP, lider di MEP Evelyn Wever-Croes a reacciona riba e discurso di fin di anja di Mike Eman. “Mi no a scucha henter e discurso , sinembargo di locual cu mi por a scucha mi por conclui cu Mike Eman ta sigi pega den anja 2009, ta ataca gobierno anterior, y e ta sigi cu su sonjonan dificil pa realisa, cu a causa solamente debe y dolor den nos pais. E lo sigi hasi y deshasi, sin importa ken mester paga e cuenta di su mal gobernacion. E dicho frances “Après moi le déluge” ta aplicable akinan, despues dimi caos y destruccion, cu ta nifica, cu Eman ta hasi y deshasi, sin importa ken mester paga e cuenta di su mal gobernacion.

Mike Eman durante su discurso di fin di anja ningun momento a demostra compasion pa e dolornan REAL cu pueblo ta pasando aden. Solamente el’a keda pega den pasado, y hasta tabata tin e curashi di insinua cu na anja 2009 e’la encontra un situacion financiero caotico. Pesey ta bon pa recorda Mike Eman, kiko el’a bin topa na anja 2009: 250 miyon florin di Plant Hotel, 280 miyon florin di BBO di Valero riba cuenta di banco. 190 miyon florin di Fondo Desaroyo Arubano (FDA), 10 miyon florin ganashi Banco Central, 40 miyon florin na cash, y entrada stabil di 200 miyon annual di BBO. Total 970 miyon florin! Placa cu Eman a caba mesora, y hasta a hinca Aruba den debenan grandi. Pues, cada biaha cu Mike Eman bisa cu na 2009 e situacion financiero tabata malo, e ta ganja!


MIKE EMAN TOTALMENTE DESCONECTA CU DOLORNAN DI PUEBLO

Durante e discurso di fin di anja di Eman, a bira obvio cu e no ta conecta mas cu pueblo, ni conose e dolornan di e pueblo, manera inseguridad, criminalidad, costo di bida impagable, aumento di BBO, cobransa di Serlimar, Parkeermeter, hedging, medidanan na caminda, falta di bon cuido di salud.  E kier duna e impresion cu cos ta bon, y hasi manera cu e problemanan aki no ta existi. Tampoco el’a enfoca riba e escandalonan den cual su gobierno ta meti y cu ta daña nomber di Aruba internacionalmente, manera e curatela cu Aruba a haya, cu a downgrade nos pais financieramente, Lainda-Gate, Kiko Gomez-Gate, Strawberry-Gate, El Pollo-Gate, Bushiri-Gate y awor Rincon-Gate.

Mike Eman ta sigi enfoca solamente riba su aventuranan BERDE, cu te ainda a causa solamente mas debe y mas dolor, sin importa KEN mester bai paga e debenan monstruoso cu e ta creando y sin importa CON mester paga e debenan ey. Pesey su discurso por wordo cataloga den un dicho: “Après moi le déluge” cu ta nifica, cu Eman ta hasi y deshasi, sin importa ken mester paga e cuenta di su mal gobernacion. Laga e caos y destruccion bin numa despues cu e baha, pasobra e no tin ningun interes con Aruba lo sali di tur e debenan aki. Pueblo di Aruba merese mihor, y pesey MEP ta presenta e solucionnan den su plan SOLO TA SALI PA NOS TUR, segun Lider di MEP.

Expresionnan haci den e articulo aki no necesariamente ta refleha opinion di ArenaPoliti.co