Presidencia di OCTA tin su bentahanan, pero tambe su responsabilidadnan 

ORANJESTAD/BRUSELAS - Aruba durante un aña ta bay dirigi 'OCTA' (Overseas Countries and Territories Association') cu un agenda inovador  y un vision cla. Prome Minister Mike Eman tabata na Bruselas siman pasa unda el a tuma e encargo cu hopi reto aki. Durante un conferencia di prensa Eman a splica kico esaki ta encera. E bentahanan, pero tambe e responsabilidadnan. E deseonan di Aruba ta grandi y manera semper Eman no a laga un oportunidad pasa bay pa no papia cu esnan cu por yuda e isla bay dilanti. Banda di a papia cu comisarionan Europeo sr. Mimica y sr. Timmermans, Prome Minister di Aruba a hiba combersacion intenso tambe cu sr. Robert-Jan Smits, kende ta 'Director General for Research and Innovation'.

Prome Minister Eman: "Nos tin tres proyecto entrega riba tereno di inovacion na Union Europeo. Aruba a gosa di hopi interes di tanto e ministerio y e persona encarga cu Inovacion sr. Smits. Nan tin un interes grandi pa e proyecto di 'algen' cu ta iniciando na Aruba pa loke ta trata e refineria." E proyecto di algen ta unda ta capta emision di CO2 y ta converti esaki den 'algen' cu tin tambe un balor riba mercado.

Eman ta haya cu e noticia di Presidencia di OCTA ta uno di hopi balor, mirando cu posicion di e isla ta wordo reconoci un bes mas riba plataforma internacional.  "Nos a haya e responsabilidad pa bay guia e agenda pa 22 isla tur rond di mundo. Un responsabilidad grandi cu ta refleha tambe e confiansa cu tin den Aruba su vision. Nos a haya hopi palabra di sosten pa e forma con nos ta mira e cooperacion entre Europa y e islanan aki den futuro. Nos ta orguyoso y agradecido, pero esaki ta pone tambe un responsabilidad grandi riba nos. Durante e aña aki nos mester bay duna contenido aun mas renoba y mas grandi di tur e areanan cu ta cay bou OCTA. Un otro responsabilidad ta pa Union Europeo tambe mira e balor di e islanan aki." Eman a splica cu na final di e presidencia di OCTA ta bay tin un reunion na Aruba caminda tur e 22 islanan (LGO) ta presente na Aruba y tambe representante di Hulanda, Francia, Inglatera, Dinamarca y di e comision Europeo. Esnan cu bin di e islanan ta bay ta dignitarionan halto, mescos ta conta pa e representantenan di e paisnan cu tin relacion cu e paisnan LGO. Asina por realisa un conferencia cu tin un impacto grandi y profundo. "Tabata un siman di reunionnan intensivo caminda Aruba a resalta pa loke ta trata nos agenda y nos vision. Un agenda hopi inovador", Eman a bisa.

Expresionnan haci den e articulo aki no necesariamente ta refleha opinion di ArenaPoliti.co