Prome Minister Eman masha interesa den varios programa cu Union Europeo ta brinda 

ORANJESTAD/BRUSELAS - Durante su estadia na Bruselas pa tuma rienda di OCTA, Prome Minister Mike Eman a tene varios combersacion cu ehecutivonan di Union Europeo cu di un of otro forma por yuda Aruba den su vision y pa amplia y logra su metanan riba tereno di sostenibilidad. Un tema importante di discusion tabata e programa 'Horizon 2020'. Eman a papia cu su director Robert-Jan Smits kende ta 'Director General for Research and Innovation'.  

Prome Minister Eman: "E programa 'Horizon 2020' ta financia estudionan cu ta wordo haci door di minimal tres instituto academico. Por ehempel e estudio riba e proyecto di alga (algen) unda ta capta e emision di CO2 ta wordo haci door di TNO y Universidad di Wageningen. Un universidad mas mester wordo acopla na e estudio aki pa asina Union Europeo haya interes pa coopera cu e programa aki di Aruba." Eman a splica cu esaki ta un di e condicionnan cu a pone durante e negociacionnan cu Citgo. Un proyecto - di algen - cu mester bin banda di esun di uzo di LNG of di gas natural pa asina e refineria por habri den un forma mucha mas 'berde' cu e tabata antes.

Eman a haci uzo di e oportunidad tambe pa papia cu ehecutivonan di un otro programa cu yama 'BEST' (Biodiversiteit en Eco Systemen) cu ta encera cu henter mundo ta 'fia' e islanan unda biodiversidad ta hunga un rol importante nan espacio y experiencia cu ayudo financiero di Union Europeo pa haci estudionan importante riba temanan actual manera cambio di clima den mundo. "Con e cambio di clima aki ta afectando e biodiversidad di e islanan y con evita esaki. Con hasta retrocede e efectonan negativo. Na Boneiro tin un bunita proyecto caminda e rifnan ta wordo planta di nobo pa pone un paro na e daño cu e desaroyonan economico y cambio di clima ta causando. Ta sorto di proyectonan asina cu Union Europeo ta financia for di e fondo di BEST pa nos tambe ta hopi interesante." Eman a bisa cu el a papia tambe cu Clyde Abrahams, diputado di Boneiro riba e posibilidad pa Boneiro y Aruba intercambia di informacion riba e proyecto aki unda ta planta rifnan di nobo cu a wordo afecta door di e trafico riba lama, pero tambe door di por ehempel uzo di 'lotions'. "Pa nos ta importante pa reestablece e balansa den nos sistema di biodiversidad y interesante den esaki ta e cooperacion cu por haya di Union Europeo", Prome Minister a subraya cu esaki y otro programanan interesante e bentaha cu UE ta ofrece.

Expresionnan haci den e articulo aki no necesariamente ta refleha opinion di ArenaPoliti.co