Minister Otmar Oduber: a bishita Gobernador
![Otmar17](/images/2016-press/Otmar17.jpg)
Despues di ya caba pa algun siman den seno di Conseho di Minister y den seno di partido a atende, discuti y aclaria puntonan di vital interes pa pueblo di Aruba, diamars mainta Minister Otmar Oduber a bishita gobernador pa un bishita di cortesia. Esaki despues cu ya caba e la dirigi un carta na su excelencia algun dia atras informando di e desaroyonan positivo cu a tuma luga. Minister Oduber ta comenta cu e diferente puntonan di atencion awor a bira puntonan di prioridad den Conseho di Minister. Referiendo na su decision e ta di opinion cu un persona ta keda eligi dor di e pueblo di Aruba pa haci un trabou y na momento cu bo ta sinti cu bo ta haya oido ta pasa locual a sosode dia 6 di januari ultimo. Sr. Oduber ta bisa: "Den un forma hopi madura a sinta na mesa a hiba combersacionnan, a haya oido y naturalmente esey ta significa cu bo ta sigui eherce bo trabou cu e mesun amor, cu e mesun pasion pero sigur tambe cu e mesun principionan cu bo a inicia bo carera politico cu ne. Nos ta laga tur cos y pone Dios nos dilanti y sigur cosnan grandi ta wordo haci pa e comunidad aki."
E mandatario ta sigui menciona cu su conviccion ta mas grandi cu nunca unda cu e ta forma parti di un ekipo, unda a papia di e diferencia cu tabatin y awor ta tras di lomba. Tin trabounan grandi cu mester wordo haci unda hunto lo sigui traha pa Aruba.
Minister Oduber ta finalisa bisando: "Como politico na final esey ta locual mi ta pone mi dilanti pa haci y awe a base di respet y principio nos ta cla pa continua."
Expresionnan haci den e articulo aki no necesariamente ta refleha opinion di ArenaPoliti.co