ORANJESTAD - Parlamentarionan di MEP en bista di noticianan cu tin rond di seguridad di waf ultimo tempo a reuni cu director y staf di Directie Scheepvaart.
Na e reunion  tabata presente lider di MEP Evelyn Wever-Croes, y parlamentarionan Dangui Oduber, Chris Romero y Ady Thijsen. Sr Carlyle de Couteau hunto cu e staf di e directie a duna informacion tocante e funcionnan y responsabilidadnan di e directie pa loke ta trata seguridad di nos awanan teritorial y cumplimento cu exigencianan internacional di ISPS. Aparte di esey a duna splicacion tambe di e forma con maneho maritimo ta contribuyendo na desaroyo economico di nos pais y especialmente e papel cu Parlamento por hunga den esey.
"E aspecto di seguridad na nos wafnan tin nos preocupacion y nos ta satisfecho di scucha con Directie Scheepvaart ta atende cu esaki y cu e tin nan atencion. Nos ta gradisi sr de Couteau y su staf pa e reunion extenso y hopi informativo" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co