Na april 2013 net promer cu eleccion cu hopi fanfaria Minister Eman a gaba cu ela logra sera e Acuerdo di Diahuebs Santo den cual Aruba lo por bay fia placa via Hulanda na un interes reduci. Haciendo uso di e facilidad di prestamo aki nos Pais lo por a logra baha nos gastonan di interes y na caminda reduci e MEGADEBE di nos Pais. Pero desde 2013 pa awor Minister Eman a deja di actua pa asina por cumpli cu e rekisitonan di e Acuerdo di Diahuebs Santo y di e manera aki a laga e gasto di interes di nos Pais bira mas di 200 miyon florin pa aña.

Gasto di interes ta keda subi
Den su conseho riba Presupuesto 2015 y 2016 di nos Pais, Raad van Advies a duna un bista con e gastonan di interes di nos Pais ta subiendo rapidamente. Na 2010 e gastonan di interes tabata na 126,9 miyon y na 2015 e gastonan aki a yega caba na 202,3 miyon florin. Raad van Advies a mustra tambe cu na 2010, e gasto di interes tabata come 10,7 % di e entrada di nos Pais y na 2015 ya 17,4% ta bay pa paga interes so. Esaki ta un trend peligroso ya cu si mas placa bay pa paga interes menos lo keda pa inversion necesario pa Pueblo.

Fia na 1% enves di 5,5% di interes
Haciendo uso di e Acuerdo di Diahuebs Santo, Aruba por a bin na remarke pa fia placa na 1% di interes enves di e 5,5% di interes pa cual awor nos ta fiando placa riba mercado internacional. E placa cu Aruba por a spaar di e manera aki lo por a bay pa baha e debe di nos Pais y trece poco poco na e normalidad cu nos Pais a conoce promer cu 2010, na unda cu di cada 1 Florin 40 cent ta bay pa paga debe. Mester remarca cu na 2015, di cada 1 florin 82 cent ta bay pa paga debe. Esaki ta un situacion hopi peligroso, ya cu segun un estudio di IMF pa Caribbean Small States, asina cu 55 cent di bo florin mester bay pa paga debe, e economia di bo Pais ta tranca severamente.

Eman a deja di actua
Si Minister Eman a goberna na un manera serio, teniendo e gastonan di gobernacion abou y un deficit manehabel na unda no tabata tin mester a bay presta sumanan grandi den exterior pa por sera e buraco den nos finanzas publico, ja caba nos Pais por a cumpli cu e rekisitonan di e Acuerdo di Diahuebs Santo. Pa Pueblo esaki lo a significa un alivio tambe den nan cartera, ya cu no mester a bin belasting extra pa por a yena e caha di gobierno. Pero ta como cu Minister Eman a deja di actua, awe Pueblo mester wordo maltrata cu tur tipo di belasting pa asina por paga entre otro e mas di 200 miyon di gasto di interes pa e MEGADEBE haci pa Gabinete Eman.

1 maart 2016

Expresionnan haci den e articulo aki no necesariamente ta refleha opinion di ArenaPoliti.co